Un keho òf reklamo mal manehá no solamente por nifiká pèrdida di kliente pero tambe por pasa ku un kliente ta konta otronan su mal eksperensia i daña e nòmber di un kompania ainda mas. Un keho òf reklamo bon manehá por nifiká un oportunidat pa sa unda bo ta fayando den bo kompania òf kon bo por mehorá bo produkto òf servisio pa asina reforsá e relashon entre e kompania i su kliente i laga e kliente sinti su mes balorá dor di bai mas leu di loke e ta spera.
Kon pa manehá un keho di un kliente?
Ta eksistí maneranan strukturá ku un kompania por usa pa pasa den e proseso di keho ku un kliente di tal manera ku komo komersiante bo por evitá ku un keho ta bira un problema i mas bien e keho ta bira un oportunidat pa e negoshi.
Konfrontá e problema rápidamente
Asina un kliente bini ku su keho drenta na e negoshi atendé esaki mas pronto posibel. Atendé e kliente semper ku rèspèt. Laga lokual bo ta hasi i duna e kliente e atenshon nesesario. Si bo risibí un keho via karta òf mail, no laga muchu tempu pasa pa kontestá, ounke por ta ainda bo no tin un solushon pa e problema. Si bo mes a diskubrí un fayo kometé den bo kompania, no warda te ora e kliente bin duna keho. Aserka e kliente si por di un forma pro aktivo, komuniká ku e kliente i ofresé un solushon. Asina lo bo demostrá bo kliente bo interes pa yud’e.
Skucha atentamente
Na momentu ku bo ta konfrontá e keho i papia ku e kliente, skucha atentamente. Dun’e espasio pa manifestá su keho sin interumpié òf kòrta su palabra te ora e finalisá. Si bo pone atenshon i skucha lo bo por komprondé e keho mihó, sa unda kos ta bai fout den bo organisashon pa mehorá, i tambe bo ta demostrá interes pa e situashon di bo kliente. E trato aki ya lo kalma e kliente i kita rabia òf malkontentu.
Mustra aprobashon
Despues ku bo a skucha e kliente atentamente laga e sa ku duna aprobashon na loke e kliente a bisa i lag’e sa ku bo a komprondé si situashon. Evitá di hasi gestonan di fastidio òf di desaprobashon hasta ora na bo opinion e kliente no tin rason. Limitá bo mes na knek ku bo kabes i hasi preguntanan pa sigurá bo mes ku bo a komprondé e situashon bon. Ku e muestra di aprobashon bo ta duna e kliente e señal ku bo a komprondé e motibu di su keho i ku bo ta duna e keho valides. Na momentu ku e keho no ta bálido, indiká esaki amigablemente na e kliente.
Ofresé bo diskulpa
Asina bo kaba di aprobá e keho, pidi bo diskulpa dirèkt. Indiká ku bo ta tuma responsabilidat pa e problema surgí i indiká tambe ku lo hasi trámitenan pa e fayo aki no pasa mas den e kompania.
Komuniká kon ta solushoná e problema
Komuniká na e kliente kua ta e medidanan ku bo ta bai tuma pa solushoná e problema. Bisa kla kiko bo ta bai hasi, kon bo ta bai hasié i kuantu tempu lo tuma pa hasi esaki. Si e kliente no ta satisfecho ku bo proposishon, puntr’e kiko den su bista lo ta e manera pa solushoná e keho. Si e kliente bini ku un proposishon razonabel, hasi tur posibel pa satisfasé su petishon.
Resolvé e problema
Asina bosnan yega na e solushon pa e keho, hasi i loke bo a kumbiní mas pronto posibel i den e tempu ku bo a palabrá ku e kliente. Hasi loke bo a palabra den e tumpu ku bo a palabrá i manera bo a palabrá ku bo kliente. Si bo ta dependé di otro partidonan pa resolvé e keho indiká esaki na bo kliente i tene na altura si tin retraso okashoná pa un terser parti.
Ofresé “algu mas”
Ora e keho keda solushoná ofresé “algu mas” na e kliente komo kompensashon pa su tempu i molèster i pasenshi. Ofresé un bòn di deskuento pa e siguiente biaha. Asina bo ta garantisá tambe ku e lo bini bèk i lo por keda mantené su relashon di kliente ku bo.
Hasi follow-up
Finalmente, e manera perfekto pa sera un kaso di keho komo kompania ta pa hasi follow-up. Yama òf tuma kontakto ku bo kliente despues di un siman ku e keho a keda resolvé i puntra ku tur kos a sigui bon den kaso di un reparashon por ehèmpel. E kliente ta sinti su mes balorá i lo apresiá e gesto i atenshon di e kompania.