Nos hóbennan ta futuro di Kòrsou. Un frase ku durante añanan nos a bin ta skucha i ku sigur a fungi komo konsientisashon bou di e komunidat Kurasoleño. Hasiendo uzo di e frase aki komo un vishon pa pais Kòrsou, nos komo siudadanonan konsiente mester aportá i hasi e vishon aki posibel.
Kiko nos mester hasi pa garantisá ku nos hóbennan ta nos futuro? i kiko nos por hasi pa brinda nos hóbennan un futuro briante? Esaki t’e dos preguntanan kardinal pa garantisá un futuro briante pa nos pais.
Gobièrnu di Kòrsou, ku bista riba realisashon di e vishon ariba menshoná, a kuminsá ku e proyekto Enseñansa liber. Un proyekto kaminda gobièrnu di Kòrsou ta pone bukinan di skol na disposishon di nos hóbennan ku ta bayendo skol avansá gratuitamente i pa asina nan por traha riba nan propio futuro i futuro di Kòrsou. Fundashon Material pa Skol ta e fundashon ku for di aña eskolar 2015/2016 tin e enkargo di gobièrnu pa ehekutá e proyekto Enseñansa liber.
Fundashon Material pa Skol (FMS) ta un fundashon di enseñansa di gobièrnu i ku a keda funda na aña 1987 ku e meta prinsipal pa desaroyá materialnan edukativo pa skolnan di Kòrsou. Tur e materialnan edukativo ku FMS ta produsí ta atraktivo pa e studiante debí ku nan tin tokenan Kòrsou su kultura, naturalesa, realidat etc.
Biniendo bek riba enseñansa liber, mester remarká ku esaki tabata unu eksitoso e aña aki atrobe. Un kantidat di 37 skol avansá a forma parti di proyekto aki. E 37 skolnan avansá aki ta Konsistí di tur e skolnan VSBO, AGO, SBO i HAVO/ VWO ku gobièrnu di Kòrsou ta duna supsidio. Pues skolnan priva no ta forma parti di Enseñansa liber.
Den e promé parti di Enseñansa liber (yüni te ku yüli 2016) FMS a kontrolá tur e bukinan ku e hóbennan a uza den e aña eskolar 2015/2016. Den e di dos parti (yüli te ku ougùstùs 2016), tur e bukinan aki a wòrdu registrá i pone kla pa e studiantenan di aña 2016/2017 por uza.
For di inisio di aña eskolar 2015/2016 studiantenan a wòrdu debidamente informá ku e bukinan aki ta manera un fiansa i ku e bukinan aki mester wòrdu bon kuidá. Gobièrnu ta fia e studiantenan e bukinan i nan tin ku paga bek ku nan responsabilidat. E bukinan mester wòrdu bon tratá i kuida durante ku esaki ta den propiedat di e estudiante. Segun sr. Edwin Alexander, direktor di Fundashon Material pa Skol, ta remarkabel kon e aña aki un kantidat di aproksimadamente 9000 florin di but a keda depositá riba kuenta di FMS pa studiantenan ku a maltratá òf pèrdè buki.
ENSEÑANSA LIBER
CONSUMER'S INTERNATIONAL
#JunkFoodGames
Enseñansa ku libertat. Abo su responsabilidat!