Awendia produktonan elektróniko manera kòmpiuter, printer, televishon i telefòn inteligente, ta keda bendí i komersiantenan ta pretendé di duna un tempu di garantia ku no ta aseptabel pa lei. Si un konsumidó kumpra por ehèmpel un televishon, pa regla esaki mester por dur’é mínimo 3 aña sin daña i/òf kibra. Esaki ta algu konfirmá pa verediktonan di Korte. Si e daña tòg, lei ta sali for di e punto di bista ku ta trata di un televishon di kalidat inferior. Konsekuentemente e komersiante tin sierto debernan pa ku e konsumidó.
Na promé lugá e konsumidó por eksihí pa drecha òf kambia e televishon pa un nobo. Si esaki no ta posibel e konsumidó tin derechi di disolvé e kompra i haña su sèn bek. Otro ehèmpel klásiko ta kompra di telefònnan inteligente. Si bo kumpra un telefònnan i esaki daña denter di por ehèmpel un aña, e komersiante no por bisa ku e no por hasi nada p’abo. Komo konsumidó bo por a spera ku e telefòn ta funshoná por lo ménos 1 aña sin problema. Si e komersiante ninga di hasi algu pa bo, bo tin derechi di disolvé e akuerdo di kompra i eksihí bo sèn bek. E komersiante no por hasi apelashon riba garantia i ninga di regla e asuntu. Pa konkluí nos ke bisa, ku ta hopi lamentabel ku e konsumidó hopi bia no sa su derechi òf ta laga di hasi uso di dje.
Hopi ta di opinion ku ta montantenan chikí i ku e gastunan hopi bia ta surpasá preis di e produkto. Bou di ningun sirkunstansia esaki mester ta motibu pa sigui tolerá ku produktonan inferior ta keda bende riba nos merkado. Si e produkto ku bo a kumpra, resultá di ta unu di kalidat inferior, sali i buska bo derechi.
Artíkulo ta kortesia di abogado
Sr. R.M.L. Conquet