DERECHI I DEBER
Un produkto ku daña promé ku 6 luna transkurí pa lei ta unu inferior i no konforme
E produkto no mester a daña i/òf kibra si, pa falta di e konsumidó mes. Bou di tur otro sirkunstansia e komersiante tin e obligashon di kambia òf drecha e produkto. Asta ta asina, ku despues ku e tempu di garantia stipulá pasa, e konsumidó ta keda ku sierto derechinan. Loke primeramente ta hunga un ròl ora ta trata garantia riba produkto, ta e loke a ser bisa di e produkto, por ehèmpel den propaganda, pa konvensé e konsumidó pa kumpra e produkto.
Ta reina hopi konfushon i bruashon ora ta trata e tópiko di garantia duná, na momentu di kumpra di un òf otro artíkulo. Nos a tuma nota di un komersiante ku a pretendé di duna 1 luna di garantia riba un produkto elektróniko ku bal mas ku 700,- florin. Apesar ku esaki tabata para skibi riba e bon, e no ta aseptabel pa lei. Buki 7 di nos Kódigo Sivil na promé lugá ta sali for di e punto di bista, ku un produkto no por daña den e promé 6 lunanan ku e keda usa. Si esaki sosodé, por konsiderá e produkto unu inferior, ku no ta apto pa ta riba merkado.
Na di dos lugá mester wak si e produkto ta unu di un marka karu òf un marka ménos karu. Loke tambe ta hunga un ròl, ta si e produkto ta unu nobo òf segunda mano. Por último mester wak e preis ku e konsumidó a paga pa e produkto. Di un produkto di un marka karu por spera ku esaki ta bai tempunan largu, sin daña i/òf kibra. Si e komersiante na momentu di bende e produkto elogiá e produkto, e konsumidó por konfia ku e produkto ta unu di bon kalidat