DERECHI I DEBER
Bo a bestèl un produkto, pero te ainda nan no a hasi entrega di dje na bo?
Hopi biaha tin pará riba e wèpsait di e komersiante, òf den e kontrakt ta stipulá ki ora i/òf dia lo hasi entrega di e produkto. Tin ora hasta partidonan ta stipulá un fecha konkreto pa hasi entrega di e produkto.
“Abo komo kumpradó/konsumidó tin e derechi pa nan kumpli ku e palabrashon/akuerdo aki.”
Pero kiko ta bo derechinan pa ku entrega? Esaki ta dependé di e palabrashon di e entrega. Akinan bo por distinguí 3 diferente senario:
Tin un fecha tentativo
Si den e akuerdo di pedido (bestelling) ta indiká ku dentro di 2 siman e ta wòrdu entregá, e ora ei nos ta papia di e supuesto fecha di entrega (“vermoedelijke levertijd”). Esei ta nifiká ku probablemente bo tin ku duna e komersiante tòg èkstra tempu di entrega pa e por kumpli ku entregamentu di e produkto. Kon largu e èkstra tempu aki ta, te dependé atrobe di e sorto di produkto i tambe kuantu tempu a palabrá kaba pa hasi e entrega.
Por ehèmpel: Si den e akuerdo boso a stipulá ku den 2 siman e produkto lo wòrdu entregá, por surgi ku bo tin ku warda por ehèmpel 1 siman mas. Pasó e promé 2 simannan no ta eksakto, e ta un “supuesto fecha di entrega”. Si resultá ku despues ku bo a duna èkstra tempu pa entrega i ainda e komersiante no entregá e produkto, abo komo konsumidó tin mag di disolvé e akuerdo. E komersiante no mester entregá e produkto mas i abo no tin ku paga. Si akaso bo a paga un parti òf kompletu, bo tin derechi na haña bo sèn bèk.
Tin un fecha eksakto
Si resultá ku un fecha eksakto a wòrdu palabrá, kaminda riba e dia ei e entrega mester tuma lugá òf si e komersiante/bendedó sa ku ta importante pa hasi entrega promé ku e fecha ei (por ehèmpel e shimis di kasamentu kaminda e komersiante sa ki dia e kasamentu ta) e ora ei abo komo konsumidó no tin nodi di dun’é èkstra tempu pa hasi entrega. Si ta esaki ta e kaso, i bo no ke e produkto mas e ora ei abo konsumidó tin mag di hasi e kompra disolvé e akuerdo mes ora, manera e fecha a pasa.