Un kontribushon di
Komersio elektróniko, o mihó konosí komo e-commerce, ta konsistí di kompra i benta di produkto i servisionan via internèt. Ku kresementu di uso i popularidat di World Wide Web (www) den añanan 90, e-commerce tambe a lanta kabes komo é manera pa prinsipalmente bende un produkto i servisio via internèt, usando komo forma di pago medionan elektróniko, manera un tarheta di krédito.
For di e tempu ei e e-commerce a krese mundialmente di un forma ekstraordinario debí ku konsumidónan tin akseso mas fásil na internèt. Benta di paña, aparatonan elektróniko i doméstiko, benta di outo i transferensianan di fondo, tur a bira posibel riba internèt dor di inovashon di plataformanan nobo pa prosesá transakshonnan digital. PayPall, Ideal, Netteller i tambe kompanianan multinashonal manera Amazon i Google a invertí den plataformanan pa implementá sistemanan di pago pa hasi transakshonnan via internèt posibel i sigur.
Aki na Kòrsou, e-commerce a bira un kompetidó fuerte pa rebendedónan lokal. Kada persona ku un tarheta di krédito por subi internèt awendia i bestèl su sapatu, shimis, oloshi òf hasta un outo. For di punto di bista di nos konsumidónan un progreso enorme. Pero kon ta pará ku e komersiante?
Un komersiante lokal ku lo ke bende su produkto òf servisio via internèt no tin hopi opshon pa hasi esaki. Te ainda na Kòrsou ta algun kompania tin ku ta ofresé kompanianan lokal e servisio di prosesá pagonan risibí i pasa e entrada riba kuenta di e negoshi, kobrando komishonnan relativamente haltu. Esaki ta pone ku e-commerce na Kòrsou no ta desaroyando riba e spit manera na otro partinan di mundu. Atmishon di kompanianan lokal riba plataformanan manera Netteller i PayPall i Ideal ta rekerí den hopi kaso eksigensianan ku hopi di nos komersiantenan chikí no por kumpli kuné.
Figurá bo bo ta bende bo artesania òf bo a desaroyá un sòftwèr òf training onlain i lo be ke bende esaki den eksterior. Lo tabata tremendo si bo por a traha bo wèpsait i bende bo produkto via internèt, for di bo kas. E kliente ta hasi su pago ku su tarheta di krédito via internèt, abo ta risibí bo sèn riba bo kuenta i e kliente ta “download” loke el a kumpra. Simpel, fásil i ta kontribuí na nos balansa di importashon/eksportashon i divisanan. Esaki no ta konta solamente pa benta na konsumidónan pero tambe na business-to-business o B2B, ku ta e komersio entre empresanan.
Un plataforma lokal di aseptashon di pago ta algu esensial pues pa desaroyo di e-commerce riba nos merkado. I ta p’esei ta hopi importante pa gobièrnu i komersio traha huntu i invertí den un plataforma independiente, pagabel, aksesibel i duradero, riba kua konsumidónan por tambe, hasi transakshonnan lokal, i komersiantenan por hasi negoshi ku kompetidónan internashonal. Komo komersiante lokal, ku un E-shop na Kòrsou, bo no mester tin un pakus, bahando bo gastunan operashonal i bo tambe por bende bo produktonan riba un merkado internashonal i tin e siguransa di pago riba bo benta.