Karakterístikanan pa tuma na konsiderashon
Unabes bo disidí kua funshonalidat e siguidó ku bo ke, tin mester, bo por refiná bo eskoho basá riba bo gustu personal.
Estilo
Hopi siguidó ta diseña pa wòrdu bistí na man, pero algun por wòrdu bistí komo prenda òf klep na paña. Den pasado, aparatonan tabatin tendensia di tin e aparansia funshonal so, pero fabrikantenan moderno ta mas konsiente di estilo.
Pantaya
Siguidónan mas avansá ta revelá nan informashon, demostrando palabra, number i simbolonan riba un pantaya “watchface-like”. Otro siguidónan ta kompartí e informashon via lusnan di LED òf solamente via aplikashonnan. Ora ku bo sinkronisá e informashon riba bo telefon inteligente òf kòmpiuter, e aplikashon ku ta kompaña e siguidó no solamente ta archivá e informashon, pero tambe ta yuda bo interpret’é.
Kompatibilidat
Promé bo saka sèn kumpra, sigurá bo mes ku e aparato ta kompatibel ku bo selular i bo kòmpiuter. Algun siguidó ta sinkronisá solamente ku Apple’s iOS. Otronan solamente ku Android. I mayoria no ta funshoná ku Windows.
Eksaktitut
Siguidónan no ta infalibel. Nan ta usa sensornan i algoritmonan pa kalkulá kantidat di paso, kantidat di moketa tira, trapinan subi i kantidat di ora drumi. Esei ta nifiká ku tin algun espasio pa márgen di eror. Si bo mester di dato konkreto, kisas ta bon pa bo kumpra un aparato ku funshonnan spesífiko. Por lo general, kontroladónan di ritmo di kurason ku ta pone na bo pechu ku ta transmití e informashon pa e siguidó di bo aktividatnan físiko, ta mas presis ku e aparato ku bo ta pone na bo pòls.
Durashon di bateria
Dependiendo kon sofestiká e aparato ta, e durashon di bateria por varia entre un dia i algun luna. Un siguidó ku un pantaya di tòch i un kantidat di sensor lo mester di karga ku mas frekuensia ku un simpel banchi ku solamente lus di LED. Tambe ta masha importante pa indiká ku no ta tur siguidó por wòrdu kargá. Tin algun ku ta usa bateria plat rondó, ku tambe sa wòrdu usáden kámaranan i mashinnan di kalkulá.