ENTREGA di
SERTIFIKADO
Durante di e siman mundial di konsientisashon di resistensia kontra antibiótiko, organisá pa e Organisashon Mundial di Salú (OMS), CI a inisiá un kampaña pa prevenshon di uso di antibiótikonan den animalnan. Sra. Amanda Long, direktor general di CI a indiká ku resistensia na antibiótiko ta oumentando na un nivel haltu ku ta birando hopi peligroso pa salú. Di 63.200 tonelada di antibiótiko na 2010, e kantidat di antibiótiko ku ta hasi uso di dje pa animalnan di krio lo oumentá na mas o ménos 105.600 tonelada na 2030. Aproksimadamente mitar di e antibiótikonan produsí na mundu ta wòrdu usá den agrikultura. OMS ta atvertí ku si no tuma e akshonnan nesesario, mundu lo bai bèk den un tempu kaminda un vírùs komun manera salmonèla lo por terminá ku bida di hende.
Kousa di resistensia di antibiótiko
Resistensia pa antibiótiko por wòrdu kousá pa un dósis rutinario di antibiótiko ku ta wòrdu suministrá na animalnan di krio, manera baka, porko, galiña, inkluso piská, via di kuminda i awa. Den mayoria kaso, antibiótikonan ta wòrdu usá na benefisio di produktividat i efisiensia. Antibiótikonan ta wòrdu usá pa promové kresementu mas rápido di animalnan di krio, pa prevenshon i tratamentu di malesa i pa kontrolá enfermedatnan serka animalnan. Komo mayoria di e antibiótikonan ku ta wòrdu suministrá na animalnan di krio ta importante pa medisina di hende tambe, un hende ku kome karni di un di e animalnan kontaminá aki, tambe por krea resistensia pa e antibiótikonan ku e animal a risibí. Konsekuentemente si e persona haña un vírùs ku mester kombatí ku un di e antibiótikonan ku e ta resistente na dje, e antibiótika aki lo no yud’é.
Kiko nos por hasi na Kòrsou?
Kisas resistensia kontra antibiótikonan, no ta un tema ku direktamente nos por mira, ni tampoko influensiá riba nivel nashonal na Kòrsou, pero ta bale la pena pa nos kuminsá sondia kua maneho gobièrnu tin òf tin planiá pa hiba relashoná ku e tema aki. Sigur mirando ku resistensia kontra antibiótikonan ta stipulá komo un di e sinkuenta rísikonan global den e informe di e Foro Ekonómiko Mundial di Riesgonan 2013. Ta na su lugá pa investigá te na ki nivel instansianan konserní di gobièrnu ta kontrolá e nivel di antibiótikonan den karni ku nos ta konsumí na Kòrsou. Esaki ta di importansia mirando konsekuensianan ku konsumo eksesivo di antibiótiko por tin pa salú di hende. Resistensia kontra antibiótiko por kousa entre otro durashon mas largu di enfermedatnan, oumento di pashèntnan ku ta muri, oumentu di gastu di tratamentu i imposibilidat pa hasi tratamentunan ku ta dependé di antibiótikonan pa prevení infekshonnan.
E aña aki den kuadro di dia mundial di derechinan di konsumidó Fundashon pa Konsumidó lo organisá un kampaña pa konsientisá nos konsumidónan tokante di resistensia kontra antibiótiko. Meta di e kampaña aki ta pa konsumidónan bira mas krítiko pa loke ta trata ingredientenan/kontenido di loke ku nan ta kome. Keda pendiente pa mas informashon tokante di e dia aki.
“Antibiótikonan for di menú”, esei ta e tema ku Consumers International (CI) a proponé pa para ketu na dje e aña aki dia 15 di mart, dia mundial di derechinan di konsumidó. CI, a skohe e tema aki debí na un desaroyo kresiente di resistensia di antibiótikonan ku pokopoko ta formando un peliger pa salú di hende rònt mundu.
DIA MUNDIAL
DERECHINAN DI KONSUMIDÓ
NOTISIA