PROTEHÁ BO KÚTIS
KONTRA SOLO
DIARIAMENTE !
Komo siudadano di un isla tropikal, yunan di Kòrsou ta dichoso di por disfrutá di bunita splendor i dushi energia di solo. Solo ta bon pa diferente motibu, entre otro, pasobra e ta yuda: kurpa krea Vitamina D, duna un bon humor, krea un bunita kolo bruin, minimalisá problema ku kalki i fraktura di wesu i por minimalisá algun problema ku kutis manera eksema. Sinembargo, pa dushi i bon ku solo por ta, e por kousa kútis hopi daño, si e no ta protehá di un manera adekuá. E rayonan ultravioleta den solo por okashoná kemadura na kutis, hasi kutis delikado pa infekshonnan, krea pèshi, hasi wowo dòf, empeorá problemanan di kutis, kousa kanser di kueru, i embehesé kutis. Pa tur e faktornan negativo menshoná ta nesesario pa protehá kutis di un forma adekuá.
Por protehá kutis dor di no ekspon’é demasiado na solo, kome alimentonan ku ta yuda konservá kutis i tambe dor di hunta protektor di solo. E Protektor di solo di hunta ta bini den forma di krema òf spùit. Pa e protektor di solo di hunta funshoná korektamente tin algun rekesito ku mester tene kuenta kuné.
Usa protektor diariamente
No ta ora ku bo ta bai laman so, bo mester usa protektor di solo, pasobra diariamente bo kueru ta eksponé na rayonan di solo, sea ora bo ta sintá den outo ta stür òf bo ta sintá banda di un bentana den un edifisio. P’esei ta rekomendabel pa hasi uso di protektor kontra solo parti di bo rutina diario. Pa fasilitá bo, apliká e protektor, mesora despues ku bo kaba di baña.
Usa protektor di solo!