Na final di e aña aki nos di Fundashon pa Konsumidó por mira atras riba un aña hopi fruktífero pa nos organisashon. Un aña den kua nos a haña e oportunidat di hasi ainda mas aktividat pa informá i konsientisá konsumidónan di Kòrsou. Nos promé aktividat grandi di e aña aki tabata e evento eksitoso ku nos a organisá den Wilhelminaplein “Biba Salú” kaminda nos a trese huntu organisashonnan ku ta promové un bida salú pa duna informashon grátis na konsumidónan ku a partisipá na e evento. For di Zumba, Pilatus, Yoga te ku dietistanan lokal i organisashonnan ku a hasi kòntròlnan preventivo di kolèsteròl i preshon, e dia tabata unu variá i algu ku sigur nos lo ke ripití den futuro.
Tambe sigur bala pena menshoná ta e seminario ku Fundashon pa Konsumidó a organisá pa komersiante pa asina duna nan informashon pa tene kuenta kuné na momentu di traha kondishonnan general di benta di su negoshi i, tambe importante, kiko lei ta bisa i e komersiante mester tene su mes na dje ora ta trata garantia. E seminario aki nos a kompañá ku un foyeto ku nos a parti rònt Kòrsou, pa di un otro un banda, iinformá konsumidónan di derechi riba garantia. Algu otro ta e institushon di un komishon di disputa pa kompanianan di seguro kos nos a bin ta traha riba dje huntu ku Curaçao and Bonaire Insurance Association, ku a kristalisá i a trata su promé kaso e aña aki. Ku esaki Fundashon pa Konsumidó ke keda enfatisá ku mester traha huntu ku tur partido, inkluso komèrsio, pa yega na merkado balansá na fabor di un i tur.
Manera e último añanan, e aña aki nos a tene atrobe nos kurso di presupuesto grátis pa konsumidónan. Atrobe e kurso tabata un éksito rotundo ku amplio partisipashon. Tambe manera tambe ta un kustumber nos fundashon a informá abo konsumidónan tokante preisnan den supermerkado, botika i hartwernan na Kòrsou pa medio di nos komparashonnan di preis. E aña aki tambe nos a inkluí un komparashon di preis di èrko den nos programa.
Sigur un logro ku nos fundashon ta hopi orguyoso di dje ta e realisashon di nos programa di televishon “Konsumidó Konsiente”. Ku apoyo di Ministerio di Desaroyo Ekonómiko nos a logra produsí un siklo di 5 programa ku a keda transmití na televishon pa asina yega ainda mas serka di nos konsumidónan di un forma mas direkto. Den e edishon aki bo por mira e 3 episodio den e sekshon “Intermedio”. Tambe nos tabatin e espasio finansiero e aña aki pa, banda di e revista digital aki ku tur luna bo ta risibí, saka un vershon imprimí di e revista na okashon di e 40 aniversario di Fundashon pa Konsumidó.
Un proyekto ku nos a kuminsá e aña aki i ku nos lo mira su frutanan na kuminsamentu di 2016 ta un investigashon di merkado di Transporte públiko ku nos lo laga realisá den e próksimo lunanan. Nos investigadónan lo hasi entrevista ku abo konsumidó pa sa kiko ta bo nesesidatnan i kambionan ku lo bo ke mira den nos transporte públiko. Nos por spera e resultadonan den luna di mart 2016 i nos ta pidi un i tur pa, si a kaso bo keda aserká, duna bo koperashon i aporte na nos. E resultadonan lo keda presentá na gobièrnu ku rekomendashonnan pa mehorá e servisio aki.
Tur esaki nos a hasi, banda di nos trabounan diario di duna informashon i intermediá den kehonan ku abo por tin kontra di un komersiante. Pa e trabounan hasí, mi ke yama danki na e tim di Fundashon pa Konsumidó, ku tòg kada aña ta logra presta lo máksimo bou di sirkunstansianan ku semper por ta mihó. Mi speransa ta ku den 2016 e tim di Fundashon pa Konsumidó lo sigui riba e mesun pia i kisas ainda mas kreativo efektivo, pa asina duna abo e produkto i servisio ku bo ta meresé di bo Fundashon pa Konsumidó!
Marc Marshall
Direktor Fundashon pa Konsumidó
Editorial
PRÓLOGO
mensahe di fin di aña