Ken no a yega di mira esaki? Un produkto di preis
fl. 1,99 i no fl. 2,00. E dikon bo sa kaba. E ta mas barata. Pero poko ta esnan ku ta na altura di e mensahe skondí ku tin den e sistema aki.
Sigur 60% di tur preis di produktonan di konsumo ta kaba ku e sifra 9. Un polítiko ingles a bai dje leu ei di asta sugerí ku lo ta bon pa traha un moneda di 99 sèn ya asina ta evitá ku hende mester kana ku bòshi un sèn den pòtmòni. Sientífikamente ta proba ku e sifra 9 di bèrdat ta influenshá nos sentido di kumpra. Investigadornan di un universidat Merikano a hasi un investigashon kaminda den diferente edishon di un katálogo di moda nan a preis un bisti di hende muhé ku 3 diferente preis, esta $34.00, $39.00 i $44.00. Pa nan sorpresa e shimis di $39.00 a bende muchu mas mihó ku esun di $34.00.
Den e siguiente investigashon, nan a preis e mesun shimis ku 2 preis nobo. Riba unu, e shimis tabata kosta atrobe $39.00, pero riba un otro a pone ‘Deskuento! Di $48.00 pa $40.00 na lugá di $39.00 E biaha aki e bisti di $40.00 a bende mihó ku esun di $39.00. Pensamentu: Un deskuento nos no ta laga pasa bai asinasina.... Ora den e siguiente edishon a kambia e “pricetag” pa ‘Deskuento! Di $48.00 pa $39.00’ nan a bende muchu mas tantu atrobe.
E etikèt di preis tin, manera deskribí, hopi sekreto bon wardá. Un ehèmpel: Asina nos (mente) ta sinti òf kere ku un preis ku ta konsistí di hopi sifra, e ta mas karu. Un ‘Fillet Mignon’ na ‘De Librije’ no ta kosta €46.00, pero ‘kuarenteseis euro’
Un hende su sentido ta sinti ku $ 39,00 ta mas ku
$ 39,-. Mihó pa e negoshi lo tabata si e por a pone simplemente e preis so, sin e “$” su dilanti. E investigashon hasi dor dje peritonan merikano a mustra tambe ku restorantnan por a nota un oumentu drástiko den nan ganashi dor di pone riba nan menú e preis sin e valuta. Ora nan a usa e palabra dòler, por ehemplo ‘25 dòler’ na lugá di $25.00, nan benta ta subi ku kasi 8%. I si ainda mas e preisnan no ta nèchi buta bou di otro, pero zigzag, esaki tabata resultá den un èkstra subida dje ganashi di kasi 10%.
Na Hulanda e tòp restorant De Librije na Zwolle ta hasi esaki konstantemente ku su preisnan i ademas ta skibi e preis kompletu, esaki pa kita òf evitá kualke asosiashon ku sifra. (Manera nos a splika mas ariba, mas sifra nos mente mira, mas karu e pensa e kos ta). Por ehemplo un plato ta kosta ‘kuarentiseis euro’ i no € 46.00. Nos supkonsensia ta mira e preis promé komo unu mas bentahoso ku esun skibi den sifra.
Kompanianan ku ta hasi negoshi via Internet tambe ta kampion den hunga ku nan preisnan pa gana mas kliente posibel. Asina por ehèmpel nan ta manipulá ku nan preisnan dor di “hunga” ku gastunan di envío (verzendkosten). Un investigador ku a analisá e sistema di benta via Internet ta konta di un dje tiendanan di Internet aki ku ta ofresé un mesun produkto na 3 diferente manera:
1. e artíkulo ta kosta $5.00 ku envío grátis
2. preis ta $2.50 ku $2.50 gastunan di envío
3. artíkulo ta grátis ku $5.00 gastunan di envío
Interesante ta pa menshoná ku e opshon ku a skor mas mihó i pa kual konsumidónan su interes tabata mas grandi tabata e opshon di artíkulo grátis. E palabra grátis simplemente tin un efekto mágiko riba konsumidónan.
Artíkulo skibi pa Leo Pot ku ta fasiná ku métodonan ku esnan den merkadeo ta purba influenshá komportashon di kompra di konsumidónan.
E sekreto
di preis