NOTISIA
Fundashon pa Konsumidó den kuadro di selebrashon di su 40 aniversario lo selebrá i konmemorá su eksistensia den vários forma. Un di e aktividatnan ku Fundashon pa Konsumidó ta organisá ta un seminario ku e tema di garantia i kondishonnan general. E seminario aki ta tuma lugá dia 22 di òktober 2015, na Acoya Hotel. E aktividat aki ta spesialmente pa komersiantenan na Kòrsou ku ke informá nan mes di e tema di garantia i kondishonnan general.
E tema garantia i kondishonnan general ta hopi diskutí último tempu tantu bou di konsumidónan komo serka komersiantenan. Hopi ta e konsumidónan ku ta aserká Fundashon pa Konsumidó pa kuestioná kasonan kaminda ku nan ta sinti trato inhustu di parti di e komersiantenan pa loke ta trata término di garantia i kondishonnan general. Di otro banda, komersiantenan tambe ta tuma kontakto ku Fundashon pa Konsumidó, pasobra nan no ta di akuerdo ku sierto ponensia òf posishon di konsumidónan relashoná ku garantia i kondishonnan general. Hustamente pa esaki Fundashon pa Konsumidó ta trahando riba un foyeto pa konsumidónan tokante di garantia i tambe ta organisá e seminario aki spesialmente pa brinda espasio na komersiantenan pa sa mihó kiko lei ta bisa di garantia i kondishonnan general.
Pa kiko partisipá na e seminario aki?
Buki 7 di nos Kódigo Sivil ta duna un reglamentu den kua ta formulá e derechinan di e konsumidó pa ku e bendedó. E seminario aki ta informá bo tokante di e derechinan di e konsumidó relashoná ku e términonan di garantia i kondishonnan general. E ta duna bo un bista kiko por i kiko no por. Pa medio di e seminario aki bo por haña konkretamente kiko bo mester adaptá na bo kondishonnan general pa bo kumpli ku lei i bo klientenan. P’esei asistí na e seminario aki, lo ta di balor agregá pa bo i bo kompania.
SEMINARIO PA KOMERSIANTE
Fundashon pa Konsumidó ta organisá: