Tambe por spera mas investigashon riba tereno di produkto i servisio i ku lo ta mas krítiko riba kosnan ku ta tuma lugá ku ta tacha derechonan di konsumidó. Fundashon pa Konsumidó ke eduká konsumidónan mas tantu, esaki ku un enfoke riba tinernan ku tambe ta konsumidó i ku por influensiá nan mayornan.
Baluartenan di Fundashon pa Konsumidó
Sra. Lourens a para ketu na e kontribushon balioso di sierto personanan pa eksistensia i desaroyo di Fundashon pa Konsumidó. “Lo mi ke duna rekonosementu na personanan ku a hasi posibel ku Fundashon pa Konsumidó ta kaminda e ta awe.” Sra. Lourens a referí na: sra. Ana Alcantara ku tabata sali bon den prensa i ku a habri porta pa pone Fundashon pa Konsumidó den lus; sra. Ivy Doorstam ku a duna e toke hurídiko na loke Fundashon pa Konsumidó ta hasi. “El a kuminsá ku traha foyetonan di informashon i tambe a kuminsá ku e trayekto di Small Claim Court”; Sra. Lia Willems i sr. Erwin de Meza tabata presente den prensa komo bosero di Fundashon pa Konsumidó, tempu ku no tabatin kordinadó di ofisina.
"Eksito di e organisashon ta resultado di traha ku hendenan ku ta stima nan trabou i ta kere den loke nan ta hasi".
Jarmila Lourens, presidente di bestür di Fundashon pa Konsumidó
Tambe sra. Lourens ta rekonosé e kontribushon di Profèsòr Gerhard Rijken ku ta yuda Fundashon pa Konsumidó hopi bon ku konseho kon mester atendé sierto aspektonan. sra. Lourens a duna rekonosementu na e labornan di e direktor aktual di Fundashon pa Konsumidó, sr. Marc Marshall, ku a trese un era nobo. El a sòru pa un kara nobo i dinámiko di Fundashon pa Konsumidó. Sra. Lourens ta haña hopi bon ku a hasi uso di teknologia, pa yuda fundashon funshoná mas mihó. “Mi ta haña importante ku Fundashon no a keda atras i ta bai ku desaroyonan ku tin.”