Fundashon pa Konsumidó por wak bèk riba 40 aña di kresementu i desaroyo positivo. Di un inisiativa di algun siudadano di Kòrsou enfoká riba sali na vanguardia i defensa di derechinan di konsumidó den nan labornan di tur dia, 40 aña despues, Fundashon pa Konsumidó ta un ofisina profeshonal ku ta konta ku aprobashon i aseptashon di gobièrnu i komunidat di Kòrsou. Sra. Lourens ta para ketu na e importansia di e ròl di Fundashon pa Konsumidó den komunidat. “Mirando ku tin asina hopi buraku den lei, ta importante pa tin instansianan ku ta tira bista kon bon nos ta tene nos mes na leinan pa ku derechi di konsumidó i unda gobièrnu mester bini ku leinan pa salvaguardá i defendé derechinan di e konsumidó”.
Un meta diferente
Segun sra. Lourens, e enfoke di Fundashon pa Konsumidó ta distinguí su mes. “Echo ku bo ta sali pa un tema ku pa un grupo chikí ta konosí i ku no tin asina tantu atenshon. Hopi hende no ta realisá ku un konsumidó tin derechonan. Nan no ta realisá embergadura di kada transakshon ku ta tuma lugá entre konsumidó i komersiante. Fundashon pa Konsumidó no ta distinguí su mes solamente den duna informashon, pero tambe den e echo ku nos ta representá e konsumidónan ora ku gobièrnu ke bini ku medidanan ku ta toka derechonan di konsumidó. Kaminda no tin provishon di gobièrnu nos ta trata di yega na akuerdonan ku sierto gremionan. Ta di e forma ei nos a yega na e Komishon di Disputa di Seguro Kòrsou (Geschillencomissie Verzekeringen Curaçao), kaminda aseguradonan por entrega nan keho, na momentu ku nan tin kualke disputa ku nan kompania di seguro.”
Logronan
Sra. Lourens ta kontentu ku logronan di Fundashon pa Konsumidó. “Awor nos tin un ofisina mas profeshonalisá i un ròl mas grandi den komunidat. Nos por representá konsumidónan den komishonnan di gobièrnu”. Sra. Lourens ta hopi orguyoso di e konsepto di Small Claim Court ku Fundashon pa Konsumidó a entregá den koperashon ku Gemeenschappelijke Hof van Justitie. “E logro aki lo bira ainda mas grandi na momentu ku e proposishon di lei wòrdu aseptá den parlamento i e wòrdu implementá. Mi ta spera di kurason ku promé ku mi baha komo presidente esei por konkretisá”.
Un reto grandi
E reto di mas grandi di Fundashon pa Konsumidó ta e aspekto finansiero, pasobra esaki ta garantisá funshonamentu i eksistensia di fundashon. “Nos ta hopi dependiente di e maneho di gobièrnu, si nan ta mira e importansia di Fundashon pa Konsumidó òf nò. Último añanan, for di momentu ku Kòrsou a kambia di struktura i bira outónomo den reino, e gobièrnunan di turno a mira e importansia di e representashon di e konsumidó den su totalidat. Pero bo no sa nunka kiko ta bira gobièrnu su maneho”. Sra. Lourens ta kere ku maske gobièrnu bini ku un “consumenten authoriteit”, tòg ta keda importante pa tin un representashon independiente di e konsumidó, ku por vosiferá e opinion di konsumidónan den tur momentu sin tin ku tene kuenta ku regla òf limitashon ku gobièrnu ta pone.
Apresio i gradisimentu na trahadónan
Sra. Lourens tin hopi apresio i gratitut pa e trahadónan ku tin hopi aña ta traha na Fundashon pa Konsumidó. Komo e tim ta chikí, ta eksigí pa ta fleksibel pa por yuda otro kaminda mester. “Mi tin hopi apresio pa mi trahadónan, nan ta realmente stima loke nan ta hasi i ta kere den loke ku nan ta hasi. Pasobra loke Fundashon pa Konsumidó por ofresé na kondishonnan laboral ta hopi limitá kompará ku hopi otro kaminda, pero nan a keda pasobra nan ta kere den e kousa. Nos ta traha ku hendenan ku ta kere den e kousa, i esei ta nos éksito te awor.”
Mas di Fundashon pa Konsumidó
Di akuerdo ku sra. Lourens por spera ku Fundashon pa Konsumidó ta bai duna hopi mas informashon dirigí, training i workshop pa por konsientisá konsumidónan riba nan derechonan.
INTERMEDIO
TRAHADÓNAN KU AMOR I KONVIKSHON
Ingrediente pa éksito di Fundashon pa Konsumidó 40 aña