ku e tema:
TÉRMINONAN DI GARANTIA I KONDISHONNAN GENERAL
Responsabilidat di Fundashon pa Konsumidó
Fundashon pa Konsumidó tin e tarea i responsabilidat pa sali na vanguardia di konsumidónan. Nos ta informá, eduká i konsientisá nos konsumidónan. Pero tambe Fundashon pa Konsumidó ta representá i defendé konsumidónan riba diferente plataforma, entre otro komishonnan gubernamental i tambe kòmbersashonnan ku diferente kompania. Ta nos tarea tambe pa informá tur partido relashoná ku konsumidónan pa sigurá bienestar i protekshon di konsumidónan. Den kaso di e seminario aki nos ta informá komersiantenan tokante di e tema di garantia i kondishonnan general na momentu di kompra di konsumidó. Nos ta hasi esaki pasobra nos ta konsiderá ku informashon korekto i edukashon apropiá ta elemental den e proseso pa minimalisá konfliktonan.
Orador prinsipal
E orador prinsipal pa e seminario aki lo ta Mr. P. Klik. Mr. Klik a saka vários publikashon riba diferente tema. Su tésis doktoral tin e tema konformidat di kompra (Conformiteit bij koop). Su buki Benta i Benta di Konsumidó (koop en consumentenkoop), ku ta adaptá regularmente (8th ed. 2014), ta duna un kompilashon di leinan di kompra Hulandes, inkluso benta internashonal (CISG) i benta di konsumidó (EU Directives). Mr. Klik ta fungi komo lèktòr na Universidat di Kòrsou (UoC). Tambe e ta miembro di e direktiva editorial di Caribisch JuristenBlad (Caribean Law Journal) i miembro di e Komishon di Disputa di Seguro Kòrsou (GVC). Durante di e anochi lo duna un charla di e tema garantia i kondishonnan general i despues lo tin espasio amplio kaminda komersiantenan por hasi tur pregunta ku nan tin relashoná ku e tema.