KOMPARÁ I KUMPRA
GUIA
Pa hopi di nos, un outo ta un invershon finansiero grandi ku nos no ke kompliká ku fustrashon i gastunan haltu i inesperá . Fundashon pa Konsumidó ta ofresé e siguiente sugerensianan pa yuda bo tuma e mihó desishon posibel i eliminá hopi problema ku sa presentá na momentu di kompra un outo.
Skohe un diler di outo
Tur diler di outo na Kòrsou mester ta registrá na Kámara di Komersio. Kada diler di outo registrá mester pone su number di registro aktual riba oferta i faktura ku e ta duna. Skohe un bon diler, por hasi un diferensia grandi pa evitá problema durante òf despues di kompra. Tuma bo tempu pa kis entre dilernan potensial; dor di puntra bo amistatnan ku a yega di hasi negoshi personal ku un diler.
Ta importante pa hasi komparashon di diler ya ku dilernan por ofresé bo diferente “dil” riba modèlnan di outo ku karakterístikanan idéntiko. Si bo no ta sigur riba e preis, marka òf modèl di outo, no laga bo mes wòrdu papia pa kumpra promé ku bo a hasi un bon komparashon. Téknikanan di benta ku ponementu di preshon haltu ta wòrdu konsiderá komo práktikanan ilegal i deshonesto. Si bo hañabo konfrontá ku práktikanan di negoshi asin’aki, notifiká nos fundashon mes ora.
Banda di esaki paga tinu riba e siguiente síntomanan ku ta nifiká problema:
• Stür ku ta trèk pa un outo un banda so ( posibel problema ku lain)
• Brek ta pip bou di operashon normal ( uso eksesivo, gastá òf mal ahustamentu di brek)
• Huma blou ku ta sali fo’i mòfel ( por nifiká ku reparashon karu di motor ta nesesario)
• Falta di kontròl bògt na velosidat normal òf un outo ku ta bòns hopi. (posibel problema ku konekshon di stürwil òf shòk gasta)
• Kualke otro defekto nan opvio manera batimentu di motor, outo ku ta pèrdè rosea, pega òf paga, vibrashonnan fuera di normal òf mal funshonamentu di lus i señalnan di direkshon.
Bendedó di outo privá
Otro for di un diler di outo registrá, un persona priva ku ta bende su outo no tin lisensia di pèrdè ni reputashon di su negoshi pa protehá.. P’esei, bo mester ta hopi kouteloso ora bo ta hasi un kompra priva.
Un bendedó di outo priva por ta un frònt pa un diler di outo ku no ke ta responsabel pa benta di e outo. Si bo sospechá esaki, tuma kontakto mesora ku bo Fundashon pa Konsumidó.
Pa haña sa ken ta e aktual doño di e outo por tuma kontakto ku Servisio di Impuesto (Belastingdienst). Un bendedó privá por ta bendiendo un outo, deliberadamente òf no, ku tin debe riba e outo. Por ehèmpel, e bendedó por a kumpra e ku un fiansa kaminda banko ainda ta “doño” di e outo.
Si bo ta sinti ku bo por konfia un bendedó priva, hopi biaha bo por negoshá un mihó preis ku seka un diler. Pero si bo no konosé e bendedó, ta importante pa chek na Servisio di Impuesto tokante e outo ku bo ke kumpra.
Si bo no ke lanta ku e sonido di un trùk ta bai ku bo outo nobo ku ba kaba di kumpra, sòru pa no paga e outo promé ku esaki wòrdu pasá riba bo nòmber. Ora bo kumpra un outo for di un diler di outo registrá, bo ta risibí un sierto di protekshon. E diler mes por sòru pa pasa e outo riba bo nòmber promé ku e finalisá e kompra. Den kaso ku algu bai robes ta semper mas fásil pa tene un diler responsabel.
Kuantu e outo a kore?
E kilometrahe di un outo ta hopi importante pa sa kuantu tempu di bida sano e outo por tin. Un averahe normal pa un outo kore ta 15 pa 20 mil kilometer pa aña. Un outo ku tiki kilometer den su kurpa pa su edat òf ku un estado di uso no konforme ku su kilometrahe mester ta sospechoso. Kontrolá den kasonan asina e motor bon i si bo tin duda no kumpra. Si bo por demostrá ku a kambia e kilometrahe hasi semper un denunsia na polis. Mas grandi un motor di outo ta mas tantu kilometer e por kore sin ku e motor kuminsá duna problema. Un outo ku motor chikí por bai ménos largu ku un ku motor grandi.
Studia e kontrakt
Promé kubo firma algu, lesa e kontrakt bon i pasa den tur kondishonnan spesial ku por ta inkluí den bo kontrakt. Lesa tur dokumento kuidadosamente promé ku firma. Si bo no ta familiarisá ku kondishonnan den un kontrakt, kiko mag i kiko no mag, pidi un kopia di e kontrakt pa bo por repasá esaki ku un famia òf konosí ku tin mas afinidat ku e materia. Òf tuma kontakto ku nos fundashon pa guia bo den e proseso aki.
Outo segunda mano: Kontrolá e bon
Outonan segundo mano bon mantené ta den demanda fuerte. Si bo ta krítiko, hasi bon investigashon i pensa lógiko bo por haña un outo segunda mano ku ta bai bo sigur algun aña sin duna bo doló di kabes. Importante ta pa eksaminá un outo segunda mano bon di dia ora tin bon lus. Djis skòp e tayernan no ta sufisiente. Kontrolá parti paden di e outo si e stulnan ta sinta bon i no ta kibrá, chek e fahanan di seguridat i e pedalnan di brek i gas. Pedal nobo tambe por nifiká un uso intensivo di e outo. Kontrolá e kurpa di e outo riba sla òf drechá. Diferensha di kolo ta indiká ku e outo a wòrdu di spùit i por a yega di pasa den aksidente. Insistí pa kore tèst e outo pa por permití bo kore na diferente spit nan riba kamindanan di diferente kondishon, pa por evaluá prestashon di e stür, brek, shòk i lain di e outo.
No bai siegu tras di e reputashon di un marka di outo partikular òf un modèl di outo. Un bon outo nobo, por bai atras despues di tempu pa motibu di mal mantenshon òf negligensha di e doño anterior.
GUIA