Ya pa kuater aña konsekutivo Fundashon pa Konsumidó, den luna di sèptèmber, ta duna inisio na su siklo anual di Kurso di Presupuesto. Un biaha mas e intenshon di nos fundashon ta pa duna un kurso grátis den kua kada konsumidó ku ta interesá por hasi uso di e oportunidat pa siña manehá su sèn di un manera efisiente i balansá. Inskripshon ya a habri i te ku awor mayoria di e mas ku shen lugánan a keda yená. Nos ta deseá tur partisipante un kurso fruktífero i nos meta lo keda pa informá, eduká i konsientisá nos konsumidónan di Kòrsou.
Hopi di e temanan di e edishon di ougùstùs aki ta den kuadro finansiero i di presupuesto. Ku tepnan balioso kon pa manehá bo plaka i biba un bida finansiero salú. Pero tambe nos lo pone hopi atenshon na e importansia di sparmentu. Hopi di nos konsumidónan no ta realisá nan mes kuantu sèn bo ta spar si bo disidí en bes di kumpra riba fiansa, pa pone un montante apart kada luna pa kumpra e kòmpiuter òf telefòn deseá. Fiamentu di sèn ta keda algu hopi kostoso. I aki nos mester ta konsiente di efektonan ku propaganda tin riba nos mente i deseo pa kumpra.
Negoshi- i markanan ta hasi nan mayor esfuerso pa nos kumpra mas i mas. Esei ta nan meta, i nos no por tuma nan na malu. Ounke tin sierto formanan di propaganda ku realmente nos por duda ku nan ta étiko i ta trata di influensiá bo di un manera robes. Hasi fiansa pa bai karnaval òf un festival no ta un bon invershon. I si bo sa ku un biaha pa aña bo ke partisipá na un evento asina, bo por kuminsá spar un aña adelantá pa yega na e montante deseá.
Na Kòrsou no tin reglanan pa negoshinan tene nan mes na dje na momentu di hasi propaganda. Fundashon pa Konsumidó ta kere den e importansia di un instituto i reglanan pa regulá kon negoshi- i markanan ta hasi propaganda. Ideal lo tabata si komersio pone normanan pa su mes i trata su klientenan di un forma madurá i ku rèspèt i formulá un kódigo di kondukta pa ku hasimentu di propaganda.
Editorial
PRÓLOGO
MANEHÁ DEBENAN KONSIENTE