Sparmentu tambe ta bon komo ku esaki por evitá ku personanan ta kai den un sírkulo visioso di debe. Semper tin posibilidat ku konsumidónan ta haña nan ku gastunan imprevisto, por ehèmpel un wasmashin a daña òf outo no ke kore mas. Si e konsumidó no tin sèn di spar, e lo mester saka e sèn for di un otro kaminda. Diferente persona ora nan haña nan konfrontá ku gastunan imprevisto ta bai hasi fiansa pa por paga nan gastunan. Esaki no ta konsehabel komo e kompanianan ku ta duna fiansa ta kobra e konsumidó un tasa di interes sumamente haltu riba e fiansa. Tin biaha e konsumidó tin ku paga mas ku 100% di e fiansa na interes; e konsumidó ta paga e fiadó mas ku dòbel bèk di e suma ku el a fia. Pues ta kumbiní e konsumidó pa e tin un sèn di spar pa momentunan ku gastunan ku e no a konta kuné presentá.
Banko Sentral e aña aki a saka reglanan pa loke ta trata publikashon di e tasa di interes riba kuentanan di depósito. E reglanan aki ta konta entrante 1 di mei 2015. Hopi konsumidó tin kuentanan di spar na banko; algun for di mucha. Sinembargo hopi konsumidó no ta na altura di tasa di interes ku nan ta haña riba e saldo ku tin riba nan kuenta di depósito. Banko Sentral a bini ku reglanan pa publikashon di tasanan di interes riba kuentanan di depósito pa asin’ei e pueblo ta debidamente informá pa loke ta trata tasanan di interes efektivo ku tin ku wòrdu pagá riba kuentanan di depósito. Tambe e reglanan aki ta trese transparensia den e merkado finansiero lokal i ta yuda e konsumidó tuma desishonnan konsiente pa loke ta trata kuentanan di depósito.
Bankonan tin ku publiká a lo ménos e porsentahe anual di rendimentu, kual ta e tasa di interes ku ta reflehá e montante total di interes risibí riba un depósito tumando na kuenta e efekto di kalkulashon di interes riba interes risibí. Tambe nan mester hasi konosí e porsentahe nominal di interes, kual ta e tasa di interes riba un base anual sin tene kuenta ku sierto gastunan òf momentunan di pago. Nan mester publiká esakinan na momentu ku ta hasi propaganda, ora e kliente puntra pa e informashon aki òf promé ku e konsumidó habri un kuenta di depósito, manera un kuenta di spar.
Pues si abo no sa kuantu interes bo ta risibí riba bo kuenta di spar, a bira ora pa bo aserká bo banko i buska pa sa!