IMPOSIBEL
Resientemente Fundashon pa Konsumidó a haña un keho di un persona envolví den un aksidente di tráfiko. E persona aki no tabatin falta! El a aserká e kompania di seguro di e persona ku a okashoná e aksidente pa asina pag’é pa e daño na su vehíkulo. Na promé instante e kompania di seguro a pone e persona perhudiká mes paga pa e rapòrt di daño. Despues el a bin tende di e kompania di seguro ku nan no ta paga pa drecha e daño miéntras nan kliente, esta e persona ku a okashoná e aksidente, no paga su ‘eigen risico’. Si e persona perhudiká ke pa e kompania di seguro trata su kaso, e mes mester paga e ‘eigen risico’ ku e kliente debe nan, esta un montante di ANG. 150,-. Nos tin ku bisa ku esaki ta un abusu di marka mayó!
Kada persona pa lei tin e obligashon pa sigurá su vehíkulo si e ke kore riba nos kareteranan ku e vehíkulo. E persona ku kore den tráfiko ku un vehíkulo ku no ta sigurá, ta kometé un hecho kastigabel pa lei. Hopi di nos konosé personanan òf kisas bo mes a yega di eksperensiá e situashon kaminda bo tabata enbolbí den un aksidente di tráfiko i e persona ku a okashoná e aksidente no tabata sigurá. Esaki sigur ta un situashon sumamente fèrfelu kaminda hopi biaha e persona ku a okashoná e aksidente no tin sèn pa kubri bo gastunan pa drecha bo vehíkulo. Abo ta esun ku ta wòrdu perhudiká! Pero no ta e personanan ku ta hasi uso di nos kareteranan so tin obligashonnan, kompanianan di seguro tambe tin obligashonnan!
Pa loke ta trata e hecho ku e kompania di seguro a laga e persona perhudiká paga pa traha e rapòrt di daño material na su outo, esaki ta kontra lei. Segun artíkulo 3 insiso 3 di e ‘Landsverordening aansprakelijkheidsverzekering motorrijtuigen’ e seguro mester kubri e responsabilidat legal pa daño okashoná dor di e vehíkulo sigurá manera lei ta preskribí. Artíkulo 6:95 den konhunto ku Artíkulo 6:96 insiso b di nos Kódigo Sivil ta indiká ku gastunan pa determiná e daño okashoná ta inkluí den e daño ku mester wòrdu kubrí. Pues e rapòrt di daño material tin ku wòrdu pagá dor di e kompania di seguro di e persona ku a okashoná e aksidente.
E gastunan di ‘eigen risico’ tampoko e kompania di seguro no mag di kobra e persona perhudiká. Esei ta entre e kompania di seguro i su kliente; esta esun ku a okashoná e aksidente. Segun artíkulo 5 insiso 1 di e ‘Landsverordening aansprakelijkheidsverzekering motorrijtuigen’ si den e pólisa tin un klóusula a base di kua e asegurado tin ku kontribuí i kubri parti di e daño material, e kompania di seguro no opstante di esaki tin ku paga tur e daño material na e persona perhudiká, pues hasta e parti ku a base di e pólisa ta kai bou di responsabilidat di e asegurado. E kompania pues no por keda sin kubri daño material dor di bisa ku e asegurado no a paga su ‘eigen risico’. Esaki ta kontra lei!
Personanan ku ta kondusí un vehíkulo riba kareteranan mester tene nan mes na lei i e kompanianan di seguro tambe! No por ta asina ku personanan ta kumpli ku lei dor di sigurá nan vehíkulo ku kual nan ta kore den tráfiko kuné i kompanianan di seguro ta keda sin kumpli ku lei! Esaki no por!
Ken ta paga rÍsiko propio di ken?
Seguro no ke paga daño pasobra su kliente no a paga ‘eigen risico’