BO SALÚ
Identifiká e problema
Pa ki motibu un hende ta komo for di ora ku a palabrá? Manera nos splika anteriormente, nos kuminda ta direktamente relashoná ku nos emoshonnan i por lo tantu nos mester rekonosé e situashonnan ku ta afektá nos alimentashon i finalmente nos bienestar. Ta un ayudo si kada bes nos tuma nota di loke nos ta ingeri i tambe paga atenshon na nos alrededor, manera por ehèmpel ora nos ta nos so òf nos ta kompañá, kon nos estado di ánimo ta, (laf, tristu, alegre), si e lugá ta agradabel òf no etc. E datonan aki por yuda bo rekonosé un kondukta emoshonal ku por influenshá bo sistema di kome.
Den nos bida diario nos ta enfrentá situashonnan diferente, retonan nobo i kompleho ku nos no por hui di dje. Importante ta pa nos buska alternativanan i solushonnan saludabel pa e situashonnan aki i no kai den e trampa di buska e solushon òf refugio den nos alimentunan.