DERECHI I DEBER
Ku sparmentu bo ta gana!
Un tópiko sumamente importante pa nos konsumidónan ta sparmentu. Regularmente Fundashon pa Konsumidó ta para ketu na e tópiko aki ku e meta pa konsumidónan mira e benefishinan di sparmentu i disidí di kuminsá spar. Den nos kursonan grátis di presupuesto sparmentu ta hunga un ròl importante miéntras ku ora Fundashon pa Konsumidó tin ku duna informashon general, manera na skolnan, semper nos ta dediká atenshon na e tópiko di sparmentu.
Último añanan sinembargo sparmentu a bira ménos atraktivo pa motibu di desaroyonan internashonal den e sektor bankario. E tasa di interes ku e spardó ta haña riba su kuenta kada aña ta bira ménos dia pa dia. Na sierto banko spardónan ta risibí akualmente apénas 1 porshento riba nan saldo riba kuenta di spar. Kos a bai hasta asina leu ku na algun banko na Oropa e tasa di interes ta negativo lokual ta nifiká ku e spardó tin ku paga pa spar na banko.
Apesar di tur esaki ainda (miéntras ku nos no konosé tasa di interes negativo) ta konsehabel pa konsumidónan spar. Na promé lugá e ta konsehabel pa motibu di seguridat. Den e tempu aki no ta konsehabel pa konsumidónan kana rònt ku hopi sèn kèsh komo esaki ta hisa e rísiko di atrako. Na banko bo sèn ta mas seif!