Un kontribushon di
INTERMEDIO
Awendia nos no por imaginá nos pasa un dia sin nos selular. E aparato chikitu, pero poderoso aki a bira manera un ekstenshon di nos kurpa. E ta yuda nos tene kontakto ku sernan kerí, manehá sita, manehá nos finansa i hopi mas. Dor di e benefisiosonan ku e ta trese kuné ta fásil pa lubidá ku e aparato aki por wòrdu uzá dor di malechornan pa hòrta bo informashon balioso. Pa e motibu ei ta importante pa tuma e prekoushonnan nesesario pa evitá ku esaki ta pasa.
Den e mundu moderno mas i mas nos ta haña nos konfrontá ku kriminalidat digital. Malechornan sibernétiko ta hasi uzo di diferente método i instrumento pa kometé nan aktonan kriminal. Bo telefòn selular tambe por ta un di e instrumentonan aki, si no tuma prekoushonnan nesesario. Mester kòrda di semper ta atento, pasobra prevení no ta garantisá ku bo no ta bira víktima di un krímen. Pero hasiendo uzo di métodonan preventivo ta minimalisá e chèns ku bo ta bira víktima.
Pa protehá un telefòn inteligente tin diferente método. Algun di e métodonan aki ta pa prevení kriminalidat digital i algun ta pa protehá bo informashon i kisas rekuperá bo telefòn si akaso esaki a keda hòrta.
Protekshon kontra di krímen digital
Un método pa kombatí krímen digital ta instalashon un tipo di programa konosí komo un “antivírus”. E programa aki ta traha a base preventivo i reaktivo. E parti preventivo ta prevení ku e aparato ta wòrdu infektá ku un vírus dor di blòkia akseso na por ehèmpel sierto página wèp ku por ta propagá vírus i tambe i-meil ku tin “attachment” nan ku ta inkluí un vírus òf otro kontenido sospechoso (e.o. "phishing"). E parti reaktivo ta traha ora ku e antivírus detektá algu sospechoso òf maligno ku pa un òf otro motibu a logra instalá su mes riba e aparato. Un kos hopi importante pa kòrda ta ku unabes instalá e antívirus tambe mester kòrda update esaki regularmente pa asina e por prevení òf detektá menasanan nobo. Semper hasi bon uzo di eksperensia di otro usuarionan ku e produkto (“Reviews”) pa determiná ku e produkto ta unu adekuá. Tene kuenta tambe ku tin diferente sistema di operashon (operating system) pa telefòn. Buska un antivírus ku ta pas ku esun di bo selular.
Rekuperá bo telefòn den kaso di ladronisia
Tin algun antivírus ku tambe ta ofresé e funshonalidat di rastrea bo telefòn. Esaki por wòrdu uzá pa lokalisá bo telefòn si dado kaso esaki a wòrdu hòrtá. Tene kuenta ku no ta tur antivírus ta ofresé e servisio aki. Teniendo esei na kuenta ta bon pa lesa e deskripshon di e programa promé ku "download" pa asina bo sa kiko tur e funshonalidat di e antivírus ta.
Pa protehá bo informashon
Maske ku nos telefònnan selular ta indispensabel por pasa ku nos ta pèrdè nan, sea dor di un akto kriminal òf aksidental. Ta importante pa protehá bo datonan riba e telefòn, pa si akaso e wòrdu hòrta òf pèrdí nan keda inaksesibel pa personanan no outorisá. Pa protehá bo datonan, semper protehá bo telefòn selular ku un pincode. Tin di nan tin asta e oportunidat di hasi un “datawipe”, lokual lo kita tur datonan for di riba e telefòn i asina sòru pa e telefòn no funshoná mas.
Protehá bo telefòn selular