IMPOSIBEL
Studia ta bon pa bo futuro i ta grandesé bo konosementu. Hopi biaha nos ta mira un estudio den prensa, na kualke feria òf marshe i esaki ta mustra nos interesante. I nos ta pensa dikon nò? Tur hende kier amplia nan konosementu i chèns pa un mihó karera. Pero kiko ta pasa ora nos realisá ku e estudio, kurso òf tayer ku nos a kuminsá ku masha entusiasmo tòg no ta loke nos a kere òf a spera? Por stòp e estudio? I si mi stòp, mi ta haña e sèn ku mi a paga bèk òf tin chèns ku asta nan por kobra mi henter e estudio?
Esaki ta e kaso di Brian, ku a inskribí su mes pa kuminsá un estudio nivel HBO di 2 aña. Despues di un siman Brian a stòp e estudio pa diferente motibu. Seguidamente e instansha kaminda el a kuminsá e estudio ta manda un faktura indikando ku e tin di paga e suma kompletu di e estudio, referiendo na algun klóusula indiká den e kondishonnan general. Den e klóusulanan tabatin indiká ku den kaso di anulashon na komienso di e estudio, e studiante ta obligá di paga henter e montante di e estudio. Den e klóusulanan tabatin tambe poné ku inskripshon hasí ta konta pa e aña eskolar kompletu. Komo e kursista a ninga di paga loke e instansha tabata kobr’é, a disidí di bai korte ku e kaso aki.
Desishon di Hues
Hues a husga ku e stipulashonnan ku e inskripshon ta konta
pa henter e aña eskolar, por wòrdu konsiderá komo un imposibilidat
pa stòp òf kanselashon di e estudio. Hues ta haña ku e akuerdo pa
sigui un estudio hurídikamente por wòrdu kualifiká komo un akuerdo
di enkargo. (overeenkomst tot opdracht) [art.7:400-7:413 NBWNA]
Den un akuerdo di enkargo e dunadó di e enkargo (studiante) por kanselá e enkargo
ki ora ku ta. Den e kaso aki, Brian tin tur derechi di por kanselá e enkargo duná na e instansha (kas di estudio). Di e regla aki no por desviá sin mas. Si esaki ta pone den e Kondishonnan General, e ora ei esaki ta enpugná ku stipulashonnan legal. Por lo tantu, tal klóusula ta anulábel. Esaki ta nifiká ku por deklará ku e klóusula aki no aplikabel ya ku e ta kontra di lei.
Kiko ta pasa e ora ei ku plaka di estudio?
Mirando ku den e kaso aki ta trata di un konsumidó ku a sera un akuerdo, no ta posibel obligá esaki pa paga henter e plaka di estudio. Ku terminashon di e kontrato, bon mirá ta solamente e parti
ku e konsumido-studiante a sigui promé ku e kanselashon, por ser kobrá. Pues den e
kaso aki, e instansha ku a duna e estudio HBO, por kobra Brian solamente e parti di
estudio ku el a sigui. Pidi kompensashon kompletu no por serka un konsumidó.
Konklushon
Un estudio kuminsá por wòrdu suspendé si e konsumidó ta
haña ku esaki no ta loke el a premirá òf a spera. E instansha
ku ta duna e estudio, no por kobra e konsumidó e suma
kompletu di estudio, ni maske esaki ta pará den su kondishonnan
general. Por kobra e konsumidó-studiante solamente e parti di e
estudio ku el a sigui.