Konsumidó Alertá Volumen 18, yüni -yüli 2015 | Page 13

Den nos último edishon di Konsumidó Alertá nos a kuminsá toka e tema di bo derechinan komo un bon hürdó. Den e edishon aki nos lo sigui ku e tema aki pa asina bo ta bon na altura kua ta bo obligashonnan basá riba lei ora ku bo bai hür un kas.

Segun artíkulo 7:217 di nos Kódigo Sivil e hürdó tin obligashon pa hasi òf laga hasi reparashonnan chikí ku su mes sèn, a ménos ku e reparashonnan aki ta nesesario pa motibu ku e doño di e kas no a kumpli ku su obligashon pa drecha sierto defisiensianan na e kas. E artíkulo aki ta sumamente importante sigur mirando e echo ku hopi biaha personanan tin e pensamentu eróneo ku e doño di kas tin ku paga pa tur reparashon ku mester wòrdu hasí na e kas.

E artíkulo 7:217 den nos Kódigo Sivil ta un kopia di artíkulo 7:217 di e Kódigo Sivil Hulandes. Pues sigur ta interesante pa mira kiko na Hulanda ta wòrdu konsiderá komo “reparashonnan chikí” pa asin’ei nos por tin un bista mas kla di kiko ta kai bou di e artíkulo aki. Gobièrnu Hulandes na 2003 a saka un lista di reparashonnan ku tin ku wòrdu konsiderá komo “reparashonnan chikí” den e sentido di artíkulo 7:217 di e Kódigo Sivíl.

E siguiente reparashonnan segun e desishon di gobièrnu Hulandes tin ku wòrdu konsiderá komo reparashonnan chikí den e sentido di artíkulo 7:217 BW:

a. Fèrfmentu di murayanan di paden di kas, plafònt, kozein i portanan paden di kas;

b. Trabounan di preparashon pa fèrfmentu di murayanan di paden di kas, plafònt, kozein i

portanan manera plamür, yena buraku i yena skernan chikí;

c. Pega i skruf partinan di e bibienda ku ta lòs manera:

- man di trapi i man di porta;

- suich di koriente i stòpkontakt;

d. Remplasá i renobá elementonan i partinan paden di e bibienda ku fásilmente por wòrdu

remplasá sin mester di hasi gastunan konsiderabel, manera:

- partinan di kranchi;

- man di slòt di porta;

- yabinan di e slòtnan di paden i pafó;

- suich di koriente i stòpkontakt;

e. Zeta skarnirnan di porta- i bentana, zeta slòtnan i kranchinan;

f. Remplasá peranan di lus paden i pafó di kas;

g. Remplasá buzonnan di karta;

h. Mantenshon di kurá;

i. Ora berpùt yena, laga hasié bashí.

E hürdó ta responsabel pa tur daño hasí na e bibienda ku a originá pa motibu ku e no a kumpli debídabemente ku su obligashonnan a base di e kontrato di hür i kual por wòrdu atribuí na e segun art. 7:218 insiso 1 di nos Kódigo Sivil. Lei ta asumí, segun art. 7:218 insiso 2 di nos Kódigo Sivil ku tur daño na e bibienda, ku eksepshon di daño pa motibu di kandela òf na e parti pafó di e bibienda, tin su orígen den e hecho ku e hürdó no a kumpli ku debernan a base di e kontrato di hür debidamente i ku esaki por wòrdu atribuí n’e.

E hürdó segun artíkulo según art. 7:219 di nos Kódigo Sivil ademas di ta responsabel pa su mes akshonnan, tambe ta responsabel pa akshonnan di otro personanan ku tin pèrmit di dje pa ta den òf hasi uso di e bibienda.

Na final di e periodo di hür, e hürdó tin e obligashon pa entregá e bibienda bèk na e doño di kas. Si a entreg’é e kas ku un deskripshon, e kas na momentu di entrega mester ta den e mesun estado ku el a haña e kas, ku eksepshon di kambionan ku e tabatin mag di hasi òf e lokual ku dor di tempu a bai pèrdí òf daña segun art. 7:224 insiso 3 di nos Kódigo Sivil. E kas mester ta den un bon estado!

bo debernan komo

un bon hürdó (II)