Un sektor di nos ekonomia ku ta hopi den notisia últimamente ta e sektor di transporte públiko. Akshonnan di shofùrnan di bùs, diskushonnan tokante tarifa di bùs i taksi i tambe tokante kalidat i nivel di servisio ta demostrá ku tin espasio pa mehorá servisio i kalidat di transporte públiko na Kòrsou.
Loke Fundashon pa Konsumidó ta sinti falta di dje ta e opinion di e usuario di bùs, taksi i konvoi. Ami i abo ku ta esnan ku ta paga nos plaka pa un servisio, ta un di e partidonan mas importante i te ainda esun ménos skuchá. E aña aki Fundashon pa Konsumidó ke pone atenshon na e nesesidat di usuarionan di transporte públiko i lo bini den e di dos mitar di 2015 ku un investigashon di merkado den kua opinion di abo konsumidó lo ta hopi importante.
Den e próksimo lunanan nos lo efektuá un investigashon den forma di entre otro un enkuesta kaminda konsumidónan por kompartí nan eksperensianan den transporte públiko i tambe duna un aporte den forma konstruktivo indikando kiko pa nan ta aspektonan ku por mehorá òf kambia. Aspektonan manera aksesibilidat na transporte públiko, orarionan di bùs, adaptashon di rutanan, tarifa di bùs, konvoi i taksi, lo keda tratá den e investigashon aki, saliendo for di punto di bista di e konsumidó usuario di transporte públiko.
Na aña 2006 Fundashon pa Konsumidó a yega di hasi un investigashon similar bou di e nòmber “Deseo i nesesidatnan di e usuario potensial di transporte públiko”. E investigashon aki ta riba wèpsait di Fundashon pa Konsumidó i por keda bahá aki. E intenshon ta pa a base di e investigashon aki bini ku proposishonnan konkreto pa gobièrnu adaptá i restrukturá transporte públiko di un forma ku mas e ta sirbi e nesesidatnan di konsumidónan di Kòrsou. Resultadonan di e investigashon aki tambe lo keda kompará ku esnan di nos investigashon di 2006 pa analisá desaroyonan den e sektor di transporte públiko i tambe pa por enfatisá riba eventual aspektonan ku for di 2006 no a haña atenshon nesesario for di e sektor i di parti di gobièrnu.
Fundashon pa Konsumidó lo bai hasi un apelashon den futuro serkano pa koperashon di usuarionan di transporte públiko pa ku e investigashon aki. Nos ta pidi bo koperashon i aporte positivo i konstruktivo pa asina e investigashon por reflehá deseo- i nesesidatnan di konsumidónan di Kòrsou.