Den e artíkulo aki nos lo trata e disposishonnan aktualisá tokante dibulgashon di informashon di preis di krédito di konsumo. Dibulgashon di informashon di preis di krédito di konsumo.
Dibulgashon di informashon di preis di krédito di konsumo
Na promé lugá e personanan òf instanshanan ku ta ekstendé krédito na konsumidónan,a base di e reglanan nobo, mester dibulgá informashon relatá na e APR (porsentahe di gastu anual):
- Na momentu ku ta hasi propaganda;
- Na momentu ku un konsumidó pidi informashon
tokante ekstenshon di krédito;
- Promé ku ekstendé krédito na un konsumidó
E porsentahe di gastu anual, ku tin e abreviashon APR, ta e kosto total relatá ku ekstenshon di krédito na e konsumidó, ekspresá den un porsentahe anual di e suma total di krédito. Den e kaso ku ta trata fiamentu di plaka, e APR ta e kosto total relatá ku e fiansa na e konsumidó, ekspresá den un porsentahe anual di e suma fiá. E APR ta e tasa di gastu efektivo ku ta reflehá tur gasta mará na e ekstenshon di krédito na e konsumidó durante hinter e durashon di e akuerdo di krédito.
Dibulgashon di informashon ora di hasi propaganda
Ora fiadónan ta hasi propaganda, nan mester komuniká di un forma kla i konsiso, pa medio di un ilustrashon, por lo ménos e karakterístikanan prinsipal di un produkto di krédito, manera e suma di e krédito di konsumo, tasa di fiansa, porsentahe anual di gastu (APR), e términonan di pago i durashon di e fiansa. Ta rekerí ku e tasa di e fiansa huntu ku otro partikularidatnan di otro gastunan mester wòrdu inkluí den e kosto total di ekstenshon di krédito na e konsumidó.
E propaganda mester ta kla i no mag di kontené deklarashonnan engañoso, kontradiktorio òf ineksakto. Na momentu ku hasi uso di notnan, esakinan mester ta di un tamaño sufisiente i prominente pa bo por lesa esakinan. E abreviashon APR por wòrdu usá si e término ‘porsentahe di gastu anual wòrdu poné na un otro kaminda den e propaganda. Si e propaganda ta basá riba un hipótesis, esaki mester wòrdu formulá anto si den e propaganda un tasa di rendimentu ta wòrdu formulá, esaki mester ta e APR.
Divulgashon ora konsumidónan pidi informashon promé ku ekstenshon di krédito
Pa e konsumidó por tuma un desishon informá pa loke ta trata seramentu di akuerdo di fiansa, e fiadó mester duna e konsumidó tur informashon relevante basá riba e kondishonnan bou di kual e krédito ta wòrdu ekstendé.
Ora e konsumidó ta pidi informashon tokante ekstenshon di krédito òf promé ku krédito wòrdu ekstendé, e informashon relashoná ku ekstenshon di krédito na e konsumidó mester spesifiká:
- E tipo di krédito;
- E karakterístikanan di e produkto di krédito,
manera e suma di e krédito di konsumidó, tasa di
fiansa, porsentahe anual di gastu (APR), e
términonan di pago i durashon di e fiansa i un
tabèl di amortisashon (aflossingstabel).
- E términonan di e akuerdo legal entre e
konsumidó i e fiadó;
- E kondishonnan ku ta goberná aplikashon di e
tasa di fiansa.
E fiadó no tin mag di obligá e konsumidó pa tuma un produkto òf servisio, manera un seguro, for di un sierto provedó (sea persona natural òf empresa), inkluso e fiadó òf kualke persona òf empresa afiliá n’e, komo un kondishon pa e konsumidó haña ekstenshon di krédito.
Tur informashon tokante ekstenshon di krédito na konsumidónan mester ta pone di un forma kla i yamativo i mester wòrdu skibí riba un medio duradero. E tasa di fiansa i tambe e APR mester wòrdu menshoná klaramente (den e mesun format) den e akuerdo di fiansa. Ademas di esaki e konsumidó mester firma un tabèl den kual tin e karakterístikanan mas importante di e ekstenshon di krédito, kual ta e suma di e krédito di konsumidó, tasa di fiansa, porsentahe anual di gastu (APR), e términonan di pago i durashon di e fiansa promé ku sera e akuerdo di ekstenshon di krédito.
Ademas di esakinan e disposishon tokante publikashon di informashon tokante preis na momentu ku krédito ta wòrdu ekstendé na un konsumidó ta kontené un stipulashon tokante métodonan di kalkulashon di e APR i tambe un obligashon na e persona- òf instansianan ku ta ekstendé krédito pa warda tur dokumento ku ta relatá na e APR pa por lo ménos 10 aña despues di vensementu di e akuerdo di krédito.
Den e siguiente edishonnan di Konsumidó Alertá nos lo trata e otro 2 preseptonan ku ta drenta na vigor 1 di mei 2015.