instalashon defisiente
Den e kaso ku un produkto no ta korespondé ku e akuerdo di kompra, bo tin a base di artíkulo 7:21 insiso 1 di nos Kódigo Sivíl sierto derechinan. E derechinan aki ta:
a. entrega di loke falta;
b. pa e negoshante drecha e produkto, kontal ku ta rasonabel ku e negoshante por kumpli ku esaki;
c. pa e negoshante remplasá e produkto, a ménos ku e defekto ta asina chikí ku e no ta hustifiká esaki òf si e estado di e produkto a bai atras òf bai pèrdí paso e konsumidó no a sòru pa preservashon di e produkto manera un debedó kuidadoso mester hasi for di e momentu ku e mester a tene kuenta ku anulashon.
E negoshante no tin mag di kobra e konsumidó un montante ora a base ku e produkto no ta konforme e akuerdo di kompra, e konsumidó eksihí un di e 3 opshonnan ariba menshoná. Hasta ta asina ku si e negoshante no por drecha e produkto òf remplasá e produkto òf no ke duna di su banda, e konsumidó a base di artíkulo 7:22 insiso 1 di nos Kódigo Sivíl por anulá e akuerdo di kompra òf eksihí pa baha e preis proporshonalmente ku e defekto ku e produkto tin.
Mas ariba den e artíkulo nos a hasi menshon di un situashon spesífiko kaminda ku ounke e mes a instalá e produkto na un manera defisiente lei ta sali na su fabor. Esaki ta si e konsumidó a instalá e produkto na nu forma defisiente pa motibu di e instrukshonnan di montahe ku e konsumidó a risibí di e negoshante ora el a kumpra e produkto (artíkulo 7:18 insiso 3 di nos Kódigo Sivíl).
Den e kaso aki tambe lei ta trata esaki mesun kos ku un produkto ku no ta konforme e akuerdo di kompra. No opstante esaki, bo posishon ora bo laga e negoshante mes instalá e produkto ta muchu mas fuerte ku si bo mes hasié i e bai robes pa motibu di e instrukshonnan di montahe komo ku abo komo konsumidó lo tin ku probá esei!
Pues for di awe, ora bo ta bai kumpra produktonan ku mester wòrdu instalá, tene kuenta ku e benefisionan mará na laga e negoshante mes instalá e produkto pa bo!