E evenemento a kuminsá 8 or di mainta i a terminá 3 or di atardi. E feria di salú a konta ku partisipashon di diferente organisashonnan na Kòrsou i un departamentu di gobièrnu. A ubiká e organisashonnan ku a partisipá bou di diferente tènt na Parke Wilhelmina i e konsumidó por a pasa na e diferente tèntnan pa tuma entre otro informashon.
A konta ku partisipashon di e organisashonnan: SVB, SOLTUNA), SOKUDI,Stichting Prinses WilhelminaFonds, Manrique Capriles, Maneho Agrario i Peska (LVV), Fundashon Alton Paas,
Bishitantenan di e Feria di Salú tabatin oportunidat amplio pa haña informashon di kada organisashon i tambe tabatin posibilidat di hasi sierto chekeonan. Serka SOKUDI i Manrique Capriles bishitantenan por a hasi un tèst di suku grátis. Serka Curaçao Heart Foundation i Manrique por a midi preshon. Tambe tabatin oportunidat pa e promé 50 bishitantenan hasi un tèst di kolesteròl.
Na e tèntnan di Sociale Verzekeringsbank, Stichting Prinses Wilhelmina Fonds, Servisio Edukashon, Hogar i Salú por a pasa tuma informashon valioso i tambe por a midi BMI (Body Mass Index) serka e dietistanan Fraai-Rojer (ZaZu Diet Heathcare) i Blom (In Blance N.V.) Además di informashon, bishitantenan por a hasi un tèst pa asin’ei determiná si nan tin sobrepeso òf ta obeso.
Fundashon Alton Paas tambe tabata presente. Akinan ademas di a haña informashon, bishitantenan por a skohe pa hasi un ròlstul-challenge den kua nan mester kore den un ròlstul pa wak kon e ta sinti i si nan lo por move den unu. Fundashon Alton Paas tambe a organisá e parti di fitness riba e mainta aki. For di mainta 8 or te ku 12 or, bishitanten por a hasi Yoga, Zumba, Taeboo, Aerobics i Pilates riba e plenchi di Parke Wilhelmina. Hopi personanan a skohé pa partisipá na e seshonnan di moveshon i hasta algun turista a skohe di djòin. Tambe e bishitantenan por a kumpra diferente mata di bèrdura serka e organisashon Stichting Ontwikkeling Land- en Tuinbouw Nederlandse Antillen (SOLTUNA) i haña informashon tokante semia i plantamentu na Maneho Agrario i Peska.