kima
DEN CHIKÍ
Bo tabata sa ku un persona bou di 18 aña pa lei no ta apto pa sera sierto kombenionan ku tin konsekuenshanan hurídiko?
Pa sera un kombenio na promé instante partidonan mester ta apto pa hasi esaki. Esaki ta nifiká den práktika ku un akuerdo por wòrdu será solamente ora partidonan tin 18 aña òf mas i no ta bou di kuratela. Ora un hóben di 14 aña por ehèmpel kumpra un bròmer e mayor òf tutor legal por laga destruí e akuerdo di kompra aki.
Tòg di otro banda menornan di edat tin nan derechinan. Si e mesun hóben di 14 aña aki kumpra un DVD, esaki si ta wòrdu mirá komo un akto komersial ku ta normal i komun. Un akuerdo asina si no por wòrdu destruí. Otro ta si Jenny di 16 aña disidí di bai fakansi Spaña i a buk i paga su pasashi kaba. Esaki si por wòrdu destruí dor di esunnan responsabel pa e menor.
Kon por laga destruí e konvenio òf akuerdo?
Si un mayor òf esun responsabel pa e menor kier laga destruí un akuerdo será pa esaki, ta e mayor òf esun responsabel mes tin di inisiá e akshon òf proseso aki. E akuerdo será no outomátikamente ta unu ilegal, djis paso ta un menor di edat a sera esaki.
Tin 2 manera pa pidi destrukshon di un akuerdo:
1. Via un deklarashon èkstra hudisial
Esaki bo por hasié dor di manda un karta pa e negoshi kaminda e menor a hasi e kompra òf asera e akuerdo. Den e karta aki mester indiká duidelijk kiko e kompra òf akuerdo tabata i ki dia esaki a wòrdu será. Mester indiká ku esun ku a sera e akuerdo òf a hasi e kompra ta un menor di edat i ku el a aktuá sin pèrmit òf outorisashon di su mayor òf tutor legal. I ku a base di esaki ta pidi pa destruí e akuerdo i ku komo mayor òf tutor legal bo no ta sinti bo mará na e akuerdo ei.
2. Dor di un sentensha di Korte
Si e negoshante òf bendedó no bai di akuerdo pa destruí e akuerdo òf konvenio, e ora ei bo por aserka Korte pa laga destruí e akuerdo.
Fuente: Buki 1, art. 234 i Buki 3, art. 32 di nos Kódigo Sivil nobo
inkapasitÁ pa aktua