Un kontribushon di
INTERMEDIO
Fushon i Atkisishon
Den kasonan asin’aki nos ta papia di dos fenómeno ekonómiko, esta fushon i atkisishon. Fushon ta un union di dos o mas kompania hurídikamente independiente ku ta disidí di djòin otro i forma un kompania nobo. Atkisishon ta konsistí di un kompra (parsial) di un kompania dor di un otro sin ku e dos kompanianan ta integrá den otro nesesariamente. Tin vários motibu pakiko pa kompanianan hasi un fushon òf atkisishon.
Den práktika fushon òf atkisishon ta un di e maneranan mas rápido pa ekspandé bo kompania i gana tereno riba merkado. Tambe ta posibel pa kombiná partinan di dos kompania asina baha gastunan di e dos kompanianan. Strategianan di fushon i atkisishon tin bini ku su riesgonan i ta bon pa nos komo konsumidó komprondé esaki pa asina nos sa i por tuma nos posishon.
Lastu lunanan nos ta mira desaroyonan nobo ta tumando lugá aki na Kòrsou den diferente sektor ekonómiko. Kompanianan di telefon ku ta buskando partner stratégiko, kompanianan di seguro i intermediario di seguro ku ta tuma otro ofer, konglomerashon di poder den sektor di benta di outo. Ta importante pa nos komo konsumidó sigui e sorto di desaroyonan aki ku atenshon. Konsentrashon di poder i merkado den man di (alg)un kompania por ta peligroso.