Den e edishon di yanüari di nos revista Konsumidó Alertá nos a kuminsá informá bo riba bo derechinan komo pashènt. Nos a pone énfasis riba e derechi di e pashènt pa ta informá. Den e edishon aki nos lo sigui ku e tema aki.
Derechi pa duna òf nenga outorisashon pa un tratamentu
Komo pashènt abo tin derechi pa duna òf nenga di duna bo outorisashon pa tratamentu. Ta abo komo pashènt ta disidí si bo ta risibí un sierto tratamentu òf nò, no e dòkter. Komo pashènt bo tin derechi di nenga bo outorisashon pa un sierto tratamentu ku bo dòkter ta proponé òf hala bo outorisashon aden despues ku bo a dun’é. Pa sierto tratamentu, manera tratamentu ku ta karga sierto riesgo, ta pidi e pashènt pa duna su outorisashon di un forma eksplísito. Den otro kasonan ta asumí ku e pashènt a duna su outorisashon. Den e kaso ku e pashènt ta un mucha ku tin 12 aña òf mas, ademas di su outorisashon tambe ta nesesario outorisashon di e mayornan òf di su tutor. Sinembargo por hasi e tratamentu riba e mucha ku tin e edat mínimo di 12 aña ounke ku e mayornan òf tutor no duna nan outorisashon den e dado kaso ku tratamentu ta nesesario pa evitá konsekuensianan grave pa e pashènt. Tambe por hasi e tratamentu si despues di opheshon di e mayornan òf e tutor e mucha ku a alkansá e edat di 12 aña keda persistí ku e ke pa e tratamentu wòrdu hasí. E pashènt por pidi e dòkter pa pone riba papel e tratamentunan ku rísiko pa kual e ta duna su outorisashon.
Obligashon pa duna informashon i asistensia
E pashènt no solamente tin derechi pero tambe e tin sierto debernan pa ku e dòkter òf otro persona ku ta dunando asistensia médiko. Un di su debernan mas importante ta pa duna e persona ku ta dunando e asistensia médiko informashon pa asin’ei e persona por kumpli ku su banda di e akuerdo, pues dun’é tratamentu médiko. Esaki ta lógiko; sierto informashonnan ta solamente e pashènt sa. Por ehèmpel: ta e pashènt so por bisa si e tin doló òf nò, ki ora e ta haña doló i na kua momento e doló a kuminsá; e dòkter no por sinti pe. Sin sierto informashon ku ta e pashènt so por duna, e dòkter òf e persona dunando asistensia médiko no por hasi su trabou. Tambe e pashènt mester duna e dòkter e koperashon ku esaki mester pa por dun’é tratamentu. Por ehèmpel si e dòkter i e pashènt a kombení ku durante un temporada e pashènt tin ku bebe sierto remedi ku e dòkter a preskribí, e dòkter mester por konta ariba ku e pashènt ta sigui su konseho i bebe su remedinan manera indiká. Tenementu atras di informashon pa e dòkter òf keda sin duna e koperashon rekerí komo pashènt por trese konsekuensianan negativo basta serio kuné. Si un pashènt tene informashon atras pa su dòkter òf keda sin duna e koperashon ku por ferwagt di dje miéntras ku ta den su poder pa hasi esaki i esaki trese konsekuensianan grave kuné, e dòkter por terminá e akuerdo di tratamentu ku e pashènt i nenga pa sigui trata e pashènt. Un dòkter solamente por terminá e akuerdo di tratamentu ku un pashènt pa motibunan serio. Tenementu atras di sierto informashon òf keda sin duna sierto koperashon ku konsekuensianan grave por ta un di e motibunan aki.
Den nos siguiente edishon di Konsumidó Alertá nos konsumidónan por haña e último parti di e seri aki: Derechi i deber di pashènt!