Kiko ta verjaring di debe?
Na momentu ku un kreditor keda pa largu tempu sin tuma akshon pa kobra e debe, despues di un tèrmino definí, e reklamo òf kleim ya no ehekutábel mas. Pa lei un debe (normal) ta kaduká den promé instante despues di 2 òf 5 aña. Konsekuentemente, despues di e tèrmino ei, e kreditor no por demandá pago di e debe mas. Sí ta keda un sorto di responsabilidat moral den e kaso. Esaki ta nifiká ku si e debedó paga e debe aunke esaki a kaduká kaba, e no por eksigí despues pago di e sèn bèk.
Na momentu ku un debe kaduká ta e debedó mester hasi apelashon riba verjaring. Si un kaso mester yega korte, un hues no tin mag di disidí riba su mes pa investigá si e kleim a kaduká si òf no.
Kadukashon di un debe(verjaring), no ta nifiká ku no por deskontá un debe. Por ehèmpel, si e kreditor tambe tin un debe serka e debedó, apesar di verjaring, e kreditor por deskontá e debe for di loke e mester paga e debedó.
Importante tambe ta pa menshoná ku den kasonan di “kompra di konsumidó” (consumentenkoop) e tèrmino di kadukashon ta 2 aña. Esaki ta nifiká ku despues di 2 aña, e komersiante no por forsa e konsumidó pa paga e debe. Ki ora nos ta papia di “kompra di konsumidó? Esaki ta ora un persona individual kumpra un produkto òf atkerí un servisio serka un komersiante pa su uso personal.