Kiko ta e efektonan di peso di serka muchanan?
Muchanan ku tin peso di mas tin kasi semper molèster di malesanan króniko ku normal bo ta mira prinsipalmente serka adultonan. Ehèmpelnan di esaki ta preshon muchu haltu òf kolesteròl haltu, pero tambe diabétis tipo 2. E tipo 2 aki tabata konosí solamente serka hende di edat, dor ku e tabata desaroyá solamente serka adultonan mayó. Pero tambe por tin molèster di skarnir dor di sobrepeso. Debí na esaki un yu ku sobrepeso no por hunga dushi ku muchanan di su edat.
Banda di esaki sobrepeso tin influensha tantu den edatnan hóben komo edat nan mas avansá. Asin’aki un mucha muchu gordo su chèns ta grandi pa tin sobrepeso na edatnan mas avansá. E chèns riba malesa i morto ta bira mas grandi na edat mas avansá
Mi yu ta muchu gordo, kiko awó?
Muchanan ainda ta den kresementu. Nan tin mester di sufisiente alimento nutritivo pa nan por desaroyá. P’esei no ta sabí pone nan riba un dieta muchu severo i laga nan pèrdè muchu peso den un siman. Banda di esaki no ta tur dieta ta mesun adekuá pa usa serka mucha. Tambe ta asina ku ora bo stòp ku un dieta e chèns ta grandi ku bo por subi di peso bèk. Mayoria biaha ta sufisiente pa un mucha ku sobrepeso djis mantené su peso. Ku tempu e ta krese i por bai laga e peso di mas. Den sierto kasonan ta deseabel pa pèrdè peso. Esaki por ta posibel den kaso serio di peso di mas i kresementu so no ta sufisiente. P’esei traha un sita ku bo dòkter di kas pa huntu wak kua ta e mihó manera pa trata e peso di mas. Di mes ta importante tambe pa envolví e yu den esaki.
Kiko mi mes por hasi si mi yu ta muchu gordo?
Kambio nan chikitu ku bo mes por hasi. Esakinan lo no kondusí direktamente na bahada di peso drástiko, pero si ta yuda pa un bida mas saludabel.
Mas moveshon
Moveshon ta minimalisá e chèns pa sierto malesanan, gasta mas energia i drecha bo baimentu ’i af. E norma pa move salu pa mucha ta un mínimo di 1 ora pa dia. Aki batimentu di kurason i halamentu di rosea mester ta un tiki mas lihé ku normal.
Moveshon ta mas ku djis hasi deporte so. Hunga pafó, kore baiskel òf kana bai skol tambe ta importante. Loke si ta importante ta pa skohe e deporte òf e forma di moveshon ku ta pas ku bo yu. Ora ku e moveshon ta real, ta mas fásil pa mantené bo peso. Un otro benefisio ta ku muchanan ku ta move outomátikamente ta sinta ménos ketu tras di televishon i kòmpiuter. Tin mas i mas indikashon ku sintamentu ketu ta hopi malu pa bo salú.
Desayuná tur dia
Muchanan ku no ta desayuná mayoria biaha tin problema ku konsentrashon. Esaki tin influensha riba prestashon di bo yu na skol. Banda di esaki keda sin desayuná ta desfaborabel pa peso di bo yu. Hopi biaha durante di mainta ta kome mas snèk i esakinan ta sòru mas bien pa mas energia i tiki alimento nutritivo. Bo yu tin difikultat pa desayuná, kuminsá ku porshonnan chikí. Un tiki fruta òf papa òf un cracker tambe ta bon.
Ménos refresko
Aki no ta bai únikamente pa limonada, pero pa tur bebida sut. Bebidanan di fruta ta mustra hopi biaha saludabel, pero ta kontené mesun tantu suku i energia ku limonada. Tambe te ku suku òf stropi stèrki traha na kas ta kontené hopi suku. Pa baha set awa ta e refresko mas ideal. Pa duna e awa un smak por lèk nèt un tiki stropi den dje. Tambe té ku un sabor por smak sut sin ku bo pone suku aden.
Minimalisá pasa boka
Sin bo sa, pasa boka ta duna hopi kaloria. No ta nesesario pa kome kada biaha ku bo haña gana. Tòg un pasa boka de bes en kuando ta bon. Si bo yu tin kustumber di kome algu na un ora fiho, e or’ei lo e pidi ménos lihé pa un pasa boka.
Apoyá bo yu
Un mucha ku ta muchu gordo, tin e basta difísil kaba. Aktualmente kada skina ku nos bira nos ta topa ku bendementu di kuminda i hopi propaganda ta wòrdu hasi pa nan. Ta lástima ku bo no por influensha esaki, pero dor di duna un bon ehèmpel, bo ta yuda bo yu riba un bon kaminda. Banda di esaki no ta dushi tampoko pa un yu si e no mag di kome chips, pero e sobra di e famia si.