Danki pa ta lesando ya e di 14 edishon di nos revista digital Konsumidó Alertá. Di parti di Fundashon pa Konsumidó nos ta spera ku abo a disfrutá di e temporada di karnaval manera bo a deseá.
Aña 2015 a habri ya ku algun bon notisia. Den e edishonnan number 11 i 12 di nos revista nos a bolbe dediká atenshon na e violashon di lei kaminda komersiante ainda ta ofresé produktonan si OB òf ta kobra OB riba faktura- i ofertanan ku konsumidónan ta risibí. Nos a skibi kartanan pa Stichting Belastingaccountantsbureau ( SBAB) i Minister di Finansa pa atendé ku e violashonnan kontra di lei aki i resultado ta ku di parti di Ministerio di Finansa a sali un aviso ofisial atvertiendo tur komersiante ku violashonnan di lei di menshon di preis inkluso OB, lo keda multá ku un but di maksimal 10 mil florin! Nos petishon na kada konsumidó ta pa reklamá si tin negoshi ku ta kobra preisnan sin OB i denunsiá kada biaha ku bo keda konfrontá ku e tipo di infrakshon di lei aki.
Otro bon notisia ta ku Fundashon pa Konsumidó ta bringando pa ya algun aña kaba pa yega na restrikshonnan i limitashonnan na interes ku fiadónan si sèn komersial ta pidibo pa fiabo plaka. Nos a tene diferente kombersashon ku Banko Sentral di Kòrsou i St. Maarten (CBCS) pa pone bou di nan atenshon e kompensashonnan eksaherá i abusivo ku kompanianan finansiero sa kobra. Nos trabounan ta duna fruta mirando ku CBCS a anunsiá na nos fundashon ku pa promé di mei i promé di yanüari 2016 e preskripshonnan lo bai kambia na fabor di abo konsumidó. Lesa e artíkulo den e sekshon di Derechi i Deber di e edishon aki di Konsumidó Alertá Digital.
Mi ke invitá nos konsumidónan al final pa tene e fecha di 15 di mart benidero habrí den bo agènda pasó riba e dia aki Fundashon pa Konsumidó lo bai selebrá Dia Mundial di Derechinan di Konsumidó, e aña aki ku e evento grandi na Alameda. E lema di e aña aki ta “Biba Salú” i nos lo dediká atenshon ekstenso na e derechi di kada konsumidó riba alimentashon saludabel. Tur esaki i mas den e edishon aki di Konsumidó Alertá Digital. Semper pa informá i konsientisá nos konsumidónan.
derechi riba alimentashon saludabel
Marc Marshall
Direktor
Editorial
PRÓLOGO
diFundashon pa Konsumidóa internashonal di derechinan di konsumidÓ