Konsumidó Alertá Volumen 13, yanüari 2015 | Page 9

Banda di esei seguro ta informe tambe ku pa motibu di un lei di seguro nobo ku a drenta na vigor 1 yanüari 2014, no ta posibel sigurá outonan mas bieu ku 7 aña. Ora konsumidó a pidi un kopia di tal lei, e trahadó na bali no ta por a dun’é un kontesta satisfaktorio. No konforme ku e splikashon di seguro, konsumidó ta aserka nos Fundashon pa intermediashon i konseho ya ku e ta sinti ku su seguro kier trapa su derechinan.

Fundashon a tuma kontakto ku e kompania di seguro i esaki informá nos ku ta informashon robes a duna konsumidó ya ku no tin niun lei ku no ta sigurá outo bieu, pero ku esaki ta mas regla i stipulashonnan di kompanianan mes. Por ehemplo si un outo ta mas ku 8 aña bieu, un kompania di seguro por subi e prima di seguro ku 20% na momentu di prologashon di e seguro. Den e kaso aki e Kompania di seguro a lamentá e situashon ku a surgi a keda di lo tuma kontakto ku nos konsumidó pa wak kon ta yega na un areglo pa resolve e problema aki. Konsumidó tin derechi di haña su outo sigurá.

Ta bon pa bo sa:

Seguro di outo ta obligatorio. Tur outo ku ta move riba nos kareteranan mester ta sigurá. Un kompania di seguro no por ninga un konsumidó e derechi pa sigurá su outo. E mínimo na seguro ku un outo por tin ta loke nos konosé komo WA-verzekering. Esaki ta kubri daño na outo di un tersera persona si ta abo a okashoná e aksidente. WA no ta kubri daño na bo mes outo. Un kobertura WA den mayoria kaso ta rekomendabel pa outonan di 6 aña of mas. Pa un outo nobo i sigur si esaki a wòrdu prefinansiá, un seguro WA+ Casco kompletu (allrisk) of WA+ Casco ta e seguro ku mayoria kompania lo brindabo.

Sigurá, pero na unda, kon i ki tipo?

Informá òf sondiá riba merkado promé bo aseptá un oferta. Kompará kondishonnan di pago. Wak kiko èkstra e kompania ta ofresé su klientenan. Pe. Servisio di kran grátis. Tin kompania ta duna e kliente chèns pa paga e prima di seguro den 2-3 pago, otro ta eksigí ku e montante mester wòrdu kanselá den 1 biaha.

Awor, Ta bo sa ta stür?

Si ta NO, un seguro adishonal pa e di 2 shofùr/manehadó semper ta bentahoso. Tin kompania ta brinda e seguro aki pa un prima relativamente abou, otro, dependé edat dje shofùr, ta dunabo esaki grátis.

Den chikí:

• Na momentu ku tin un aksidente di outo, yama CRS na 199 i reportá e aksidente mesora tambe na bo kompania di seguro;

• No atmití niun kulpabilidat, laga CRS i bo seguro atendé ku esei;

• Maske kon insignifikante bo ta kere e daño ta, no purba regla nada riba bo mes. Si ta bo prima di no-claim bo no kier pèrdè, laga seguro atendé tur kos di e aksidente i despues palabra ku seguro ku bo ta paga seguro e sèn bek. Esaki ta posibel!;

• Repasá bo pólisa di seguro pa bo sa unda bo derechinan ta kuminsá i kaba;

• Si bo no ta konforme ku un kontesta òf desishon di bo seguro, bo tin derechi semper di entregá un opheshon (bon argumentá).