IMPOSIBEL
Fundashon pa Konsumidó ta trata e luna aki un kaso pekuliar ku un konsumidó a entrega kontra su kompania di seguro. Ta trata un kaso di disputa entre un konsumidó i su kompania di seguro den kual konsumidó ta sinti ku a trat’é di forma inhustu i den sierto forma a perhudik’é dor di no a aktua na tempu.
E kaso aki a kuminsá den aprel di aña 2013 na momentu ku konsumidó tabata envolví den un aksidente di tráfiko kual a ser okashon pa falta di e konsumidó mes. Komo e daño na outo di e kontrapartido no tabata dje grandi ei, konsumidó a disidí ku e mes lo paga e gastunan di moda ku e no ta pèrdè su “no-claim”. Konsumidó a pidi den esaki asistensha di su seguro pa nan tuma kontakto ku seguro di e kontrapartido pa wak kon grandi e daño ta, i kuantu sèn esaki lo kost’é, i konsumidó a pidi tambe pa laga e eksperto tira un bista riba e daño di moda ku e tin sigur ku ta un daño “fresku” e ta pagando p’e.
Mirando ku e kaso no ta kedando kla pa kaba, konsumidó a pidi su kompania di seguro pa wanta un ratu ku aseguro ku e mester a sera di nobo. Grandi tabata su sorpresa, ora ku na mei 2014 konsumidó ta bai pa sigurá su outo i ta haña di komprondé ku tin un keho kontra di su persona i ku pa tal motibu seguro no por sigurá su outo.
Seguro di outo ta un obligashon!