Direktor
KompartÍ, kolaborÁ i koperÁ den 2015
Marc Marshall
Direktor Fundashon pa Konsumidó
Editorial
PRÓLOGO
Na promé lugá mi ke deseá konsumidónan di Kòrsou, di parti di direktiva i personal di Fundashon pa Konsumidó, un felis i próspero aña 2015. Despues di kasi 5 aña di esfuerso i trabou duru, e aña aki nos ta premirá ku proyektonan i prosesonan lo keda realisá na fabor di nos konsumidónan.
E lei di kompetensha ku nos ta boga p’e for di 2011 lo mester kristalisá den 2015. Esaki ta e lei ku lo pone reglanan entre negoshinan i pa kombatí violashonnan manera entre otro afspraknan di preis i repartishon di merkado entre komersiantenan. E konsepto di lei ta kanando su trayekto di konseho i sigur Fundashon pa Konsumidó lo tin esaki riba su agènda pa al final esaki bira realidat. Tambe trabounan a kuminsá den gobièrnu pa yega na un Outoridat di Konsumidó ku lo tin e outoridat pa aktua kontra negoshinan ku ta violá derechinan di nos komo konsumidó. Nos ta spera ku e konsepto di lei aki lo ta kla den e lunanan benidero. E hecho aki lo ta un logro grandi pa e posishon di nos ku ta kumpra produkto- i servisionan ku nos plaka ku nos ta traha duru p’e.
Pa por hasi transparente altura i kambionan di preis di komestibel nos fundashon ya ta trahando pa basta tempu kaba na un aplikashon pa asina kada unu di nos por kontribuí pa anotá preis di produktonan ku nos ta kumpra i kompartí e preisnan ku nos pa asina nos por publiká mas komparashon di preis, ku preisnan mas aktual i di un manera mas fásil. Ya asina abo konsumidó a la minüt por hasi un bon eskoho ora bo ke hasi bo kompra. Pues den futuro serkano nos lo pidi koperashon di kada unu di nos konsumidónan di Kòrsou pa asina duna un man pa hasi nos merkado mas transparente.
Kontribuí, kompartí i koperá, ta palabranan klave den nos vishon komo organisashon. E aña aki nos lo mira un bon ehèmpel di esaki na momentu ku nos Komishon di Disputa di Seguro (Geschillencommissie Verzekeringen) lo trata su promé kasonan. E komishon aki ta un realisashon konhunto entre nos fundashon i e organisashon di kompanianan di seguro (CBIA). E intenshon ta pa kehonan entre un konsumidó i su kompania di seguro, ku Fundashon pa Konsumidó no por intermedia i resolvé, por keda hibá dilanti di e komishon, ku lo duna un veredikto imparsial ku e kompania mester tene su mes na dje. E Komishon di Disputa di Seguro ta algu úniko na Kòrsou i ta promé biaha den historia ku un asosashon di sektor i un organisashon di konsumidó a yega na kolaborashon di e índole aki. Mirando ku ta algu nobo práktika lo mustra e resultado di e kooperashon aki i e lo ta algu dinámiko den futuro.
Den 2015 nos lo traha riba kolaborashonnan aktual ku diferente otro instansianan manera BT&P, Inspekshon Ekonómiko i CBIA, ya menshoná. Pero tambe nos lo ke traha mas huntu otro organisashonnan komersial pa yega na un merkado habrí i transparente. Pasombra transparensha tambe ta un palabra klave den e vishon di Fundashon pa Konsumidó. Pa e motibu aki nos lo publiká, manera nos a bin ta hasi e último añanan, nos Informe Anual di 2014 den kua tur esnan interesá por lesa loke Fundashon pa Konsumidó a hasi den e aña tras di lomba.