DERECHI I DEBER
Bo derechinan komo pashènt
derechi riba informashon
Algu ku nos tur ta wòrdu konfrontá kuné den bida ta malesa. E por ta djis un grip ku ta pasa despues di un par di dia òf un malesa króniko. Ora nos ta malu nos ta bishitá un dòkter pa haña un diagnósis i si mester, remedi pa kombatí e kousa di e malesa. E ta algu masha normal pa nos. Lokual nos no ta para ketu n’e ta ku ora nos bai serka un dòkter pa tratamentu,nos ta sera un akuerdo ku e dòkter aki. Anto lei ta duna sierto reglanan, derechi- i debernan ku ta konta pa kada pashènt!
Den Buki 7 sekshon 5 di nos Kódigo Sivil nos ta haña e reglanan ku ta goberná e akuerdo pa loke ta trata tratamentu médiko. E sekshon aki ta kuminsá na duna un definishon na e akuerdo konserniendo tratamentu médiko. Segun artíkulo 7:446 insiso 1 di nos Kódigo Sivil e akuerdo tokante tratamentu médiko ta e akuerdo kaminda un persona natural òf un persona hurídiko, e persona ku ta ousiliá, den ehekushon di su profeshon médiko òf kompania, pa ku un otro persona, e dunadó di enkargo, ta mara su mes pa hasi sierto aktonan riba e tereno di medisina ku direktamente ta toka e persona ku ta duna e enkargo òf di un otro persona. E persona ku e aktonan riba e tereno di medisina ta toka direktamente lei ta yama e pashènt.
Obligashon pa duna informashon
Un pashènt tin derechi riba informashon. Bo dòkter, òf otro persona ku ta ousiliá, tin e deber pa informá e pashènt na un manera kla tokante un investigashon médiko ku tin ku tuma lugá i e tratamentu ku e ta rekomendá i tambe tokante desaroyo di e investigashon aki, e tratamentu i estado di salú di e pashènt. E pashènt por pidi pa e dòkter pone e informashon aki riba papel. Si e pashènt ta un mucha ku no a alkansá e edat di 12 aña ainda, e dòkter ta inform’é di un manera ku e por komprondé.