IMPOSIBEL
Pa hopi di nos ta mas ku kla ku loke mas nos mester na Kòrsou, pa nos merkado ekonómiko por funshoná, ta kòntròl transparente i habrí. For di preisnan máksimo, fechanan di vensementu te na kalidat di produkto- i servisionan ku nos ta kumpra, kòntròl ta esensial pa salbaguardiá kalidat di loke nos ta kome i uza i nos kalidat di bida.
Mas grandi bo ekonomia ta, mas difísil ta bira pa hasi un kòntròl efektivo na manera tradishonal. Mirando ku e kantidat di negoshi- i bendedóna ta bira mas, i un variedat grandi di produkto nobo ku ta subi merkado, nos komunidat lo no logra hasi un kòntròl efektivo ku dies òf binti kontroladó riba kaya tur dia. Nos mester pensa alternativanan pa por efektuá kòntròl riba un skala nobo.
Kòntròl
Un faktor esensial den e manera nobo pa por kontrolá ta outomatisashon. Den e era digital ku nos ta biba aden ta probá ku kòmpiuter ta brinda posibilidatnan pa hasi mas ku e mesun òf ménos esfuerso i rekurso. Prosesonan ta kana hopi mas lihé si nos outomatisá esakinan.
Nos por kue un ehèmpel na e proyekto piloto pa kontrolá preisnan máksimo. E proyekto ta enserá ku kada negoshi ku ta importá òf bende un produkto di Makutu Básiko mester manda, di forma digital, faktura di kada lote di produkto nobo pa Ministerio di Desaroyo Ekonómiko. Tambe mester inkluí dokumentonan relevante pa yega na e preis máksimo, a base di e márgen máksimo ku gobièrnu a stipulá. For di esaki ta stipulá e preis máksimo ku e negoshi por bende e produkto spesífiko aki p’e.
Esaki ta nifiká algun kos. Na promé lugá e bentaha ku kambionan di preisnan máksimo ta yega den rèki hopi mas lihé. Asina un komersiante ta bende un lote nobo di un produkto regulá gobièrnu ta e kalkulá i adaptá e preis di e produkto aki na e negoshi aki so.