KOMISHON DI DISPUTA DI SEGURO DI KÒRSOU UN HECHO!
Gastunan
E prosedura interno di e kompania di seguro ta sin gastunan adishonal pa e konsumidó. Den e kaso ku e prosedura interno di keho di e kompania di seguro no hiba na un resultado òf e konsumidó no ta di akuerdo ku e resultado i e aserká Fundashon pa Konsumidó pa intermediashon, e lo tin ku paga un montante di fl. 10,00 na momentu di entrega di e keho na Fundashon pa Konsumidó. Si intermediashon dor di Fundashon pa Konsumidó no tin resultado i e konsumidó entregá su petishon pa un veredikto na e komishon di disputa, e lo tin ku paga un montante di fl. 150,00 na momentu ku e hasi e petishon. Pues e montante total ku e konsumidó tin ku tene kuenta kuné pa hasi un petishon na e Komishon di Disputa di Seguronan di Kòrsou ta fl. 160,00. E montante aki sigur ta muchu mas abou ku e montantenan ku e konsumidó lo tin ku hinka den un kaso na korte.
Otro informashon
Tambe ta bon pa indiká ku miéntras ku e kompania di seguro lo ta mará na veredikto di e komishon di disputa, e konsumidó lo no ta mará na e veredikto. Komo ku e komishon di disputa ta kuminsá funshoná dia 27 di novèmber 2014 a opta tambe pa solamente tuma kehonan ku a originá riba e dia di 27 di novèmber 2014 òf despues.
Nos ta premirá ku e komishon di disputa di seguronan di Kòrsou lo trese kambionan grandi kuné komo ku awor e konsumidó tin kaminda di kana na un preis rasonabel na momentu ku e no ta di akuerdo ku desishonnan di su kompania di seguro. Ta un logro ku nos ta sumamente orguyoso di dje. Un palabra di elogio sigur tin ku bai na Curaçao & Bonaire Insurance Association pa su vishon di alza nivel di e sektor di seguro i mustrando ku komo asosashon di doñonan di kompanianan di seguro nan ta tuma nan klientenan na serio i ta duna na e balor meresé.