Veredikto Korte di Hustisia di Union Oropeo
Korte di Hustisia di Union Oropeo den un veredikto dia 18 di sèptèmber 2014 ta stipulá ku liñanan aéreo por kobra e konsumidó un tarifa apart pa transporte di maleta. A tene konsiderashon ku e kambionan ku último añanan a tuma lugá den e sektor di aviashon. Korte di Hustisia ta motivá su desishon referiendo na e hecho ku komo e modèl di operá di liñanan aéreo a kambia konsiderablemente pa motibu ku konsumidónan ta hasi hopi mas uso di transporte aéreo ku ántes, e maneho aktual di hopi liña aéreo ta pa ofresé transporte na e preis di mas abou posibel. Dor di esaki, gastunan pa transportá maleta, komo parti di e gastunan di transporte aéreo, a bira relativamente mas importante ku ántes. Pa e motibu aki liñanan aéreo por skohe pa kobra èkstra pa transportá maleta di e konsumidó. Tambe ta tene kuenta ku e hecho ku konsumidónan por skohe pa no biaha ku maleta pa asin’ei paga ménos.
Ounke ku kompanianan di aviashon por kobra e konsumidó un tarifa adishonal pa transportá su maleta, nan no mag di kobra e konsumidó un tarifa adishonal pa biaha ku ekipahe di man. Ekipahe di man mester wòrdu konsiderá komo un parti esensial di transporte di pasaheronan. Pa e rason aki kompanianan di aviashon no tin mag di kobra e konsumidó un tarifa adishonal pa e konsumidó biaha ku ekipahe di man. Tambe ta hunga un ròl e aspekto ku for di e momento ku e konsumidó check-in su maleta na aeropuerto, e liña aéreo ta responsabel pa e maleta. Esaki por trese kuné gastunan adishonal pa e liña aéreo, lokual no ta e kaso ku ekipahe di man.
Kiko esaki ta nifiká konkreto pa Kòrsou
Na e momentunan aki ainda KLM i Air Berlin no ta kobrá e yu di Kòrsou konsumidó apart pa transporte di su maleta pa e buelonan Kòrsou – Hulanda i Kòrsou – Alemania. Arke si a kuminsá kobra pasaheronan ku ta bula di Kòrsou – Hulanda òf Hulanda – Kòrsou pa transporte di maleta. Pues si bo ta bula ku Arke, tene kuenta ku bo tin ku paga apart pa biaha ku bo maleta.
Ta importante pa abo komo konsumidó sea kouteloso i sigur lesa e kondishonnan di bo ticket bon! Asin’ei bo ta evitá ku despues bo ta haña bo ta saka sèn na gastunan ‘adishonal’. Te ainda nos no ta na altura di otro liñanan aéreo ku ta kobra apart pa transporte di maleta; esaki por kambia den futuro.