PRÓLOGO
Pa añanan kaba Fundashon pa Konsumidó ta bringando pa un merkado ekonómiko habrí i transparente na Kòrsou. Esaki ta enserá un merkado habrí pa kada komersiante ku ke, bende su produkto òf servisio. Esaki tambe ta enserá ku tin kompetensha sano entre komersiantenan sin trahamentu di afspraknan di repartishon di merkado, palabrashonnan tokante preis òf kualke otro aktonan ku ta na desbentaha di e kumpradó. Nos esfuerso a resultá den leinan nobo ku ta den preparashon, kualnan ta e Lei di Kompetensha i e Lei pa Protekshon di Konsumidó. E leinan aki mester resultá den Outoridatnan di Kompetensha i di Konsumidó. E organisashonnan outónomo aki lo tin komo tarea pa perkurá ku e merkado ta drai manera lei ta stipulá. Esaki ta nifiká ku lo ta transparente ken tin outoridat pa investigá, kontrolá i sanshoná.
En prinsipio un moratorio no ta pas den e vishon di merkado liber i kompetensha sano, ku ta resultá pa regla den mihó produkto i servisio pa e konsumidó. Un merkado di protekshon ta kontra-produktivo pa ku esei. Aktornan riba un merkado protehá lo no tin un insentiva pa alsa kalidat di produkto òf pa bende esaki na un preis kompetitivo pa atraé un kumpradó. Si un komersiante sa ku ta e ta e úniko minimarket den un área di 10 òf 20 kilometer, e sa di ta sigurá di un kantidat di kliente sin tin ku hasi un esfuerso kompetitivo.
Na Kòrsou nos konosé algun sektor den salubridat ku, pa dékadanan, tin un moratorio. Konsekuensha kasi semper ta listanan di espera (wachtlijsten) enorme i aktitut arogante di sierto spesialistanan ku sa ku dor di skarsedat e dependensia riba nan ta duna nan poder.
Un moratorio semper mester ta di karakter temporal. E tempu di e moratorio mester sirbi pa adaptá òf kambia lei- òf reglanan ku no tabata bon reglá promé ku e moratorio. Den e kaso spesífiko di toko- i minimarketnan, e moratorio di algu mas ku un aña lo mester wòrdu uzá pa hasi adaptashonnan nesesario no solamente na leinan di pèrmit, pero tambe na leinan di establesementu. Spesifiká pèrmitnan i pone pa kada área di benta pèrmit- i normanan spesífiko nesesario. Si bo ke tin un karniseria, panaderia, bende produktonan fresku, remedi, produktonan inflamabel etc. den bo negoshi, bo mester tin un pèrmit apart pa hasi esaki. Pèrmitnan asina mester ta basá riba normanan di edukashon (bo mester por prueba ku un diploma ku bo por traha pan òf traha trabou di karnisero) i tambe normanan di seguridat di kandela i salubridat públiko.
Loke sigur tambe mester keda hasí den e periodo di moratorio ta atendé ku leinan di establesementu. Nos tin un asina yamá “Bestemmingsplan” den kua ta keda indiká kua ta áreanan pa biba i áreanan komersial kaminda por establesé un negoshi. Petishonnan di pèrmit mester keda aprobá tambe a base di e lokalidat kaminda e negoshi lo keda establesé pa bo no haña situashonnan kaminda un minimarket ta situá den un área yen di kas ku tur e molèster ku esaki ta bini kuné pa bisiñanan.
Direktor
Moratorio riba toko i minimarket
Marc Marshall
Editorial