ALGUN KONSIDERASHON IMPORTANTE
Prosesadó
E prosesadó di mas lihé na e momento aki ta e Apple A6X ku ta bin den e Ipad 4th Generation tèblet. E siguiente mas lihé ta e Nvidia Tegra 3 ku ta bin den e Asus Transformer Pad Infinity TF700. E prosesadó su spit ta importante pa e aplikashonnan (App) nan habri lihé i hasi eksperensha mas agradabel posibel. Otro vershon di prosesadó ku nos por menshoná ta Samsung Exynos, Texas Instruments OMAP 4470 i Qualcomm Snapdragon 4.
Kalidat di skrin
Un skrin skerpi, kla i ku ta bon visibel di vários ángulo ta wòrdu determiná pa e resolushon i tipo di pènel.
E Nexus 10 awor tin e resolushon di mas haltu ku ta 2560x1600 piksel. Ipad ta mesora su tras ku 2048x1536. Mas haltu e resolushon ta, mas kla e imágennan ta mustra riba e skrin. E tipo di pènel ta determiná si e imágennan ta keda visibel di vários ángulo i kon kla e skrin ta bira. Tambe e tipo di pènel ta determiná kon vibrante i real e kolo nan ta. Ora bo skohe un tèblet, skohe unu ku tin un IPS (In-Plane Switching) of PLS (Plane Line Switching) panel.
SISTEMA DI OPERASHON, SOFTWÈR I APLIKASHON
•
For di e promé Iphone, iOS ta e sistema di operashon ku ta manehá tur Apple su aparatonan mobil. Ku nan sistema di software bo por "kompartí" e aplikashonnan riba diferente aparato di Apple. Tambe tin un kantidat grandi di aplikashon disponibel den nan "Appstore".
•
Aunke no tin asina tantu aplikashon disponibel manera iOS, Android a bai hopi dilanti den e último tempu pa ku disponibilidat di media. Pelíkula, show, revista i partikularmente weganan a mira kambionan drástiko den kalidat i kantidat di selekshon. Android su vershon último ta 4.2, loke nan ta yama Jelly Bean. Ofisialmente e ta drai riba e Google Nexus so ainda.
•
E vershon nobo di Windows ta un kambio total di loke nos a kustumbrá kuné. Tin hende ku lo tin problema pa adaptá nan mes na dje na kuminsamentu, pero si bo traha un tiki kuné lo e bira fásil. No tin hopi aplikashon ainda pa traha kuné, pero eseinan lo bini sigur den un futuro serkano.
•
E sistema di operashon Amazon ta drai riba e Kindle Fire tèblet. E aparatonan aki ta hopi di fokus riba buki. Tambe strim video i hürmentu di buki ta posibel. No ta di spera ku lo tin mes tantu aplikashon manera pa iOS i Android.
OPSHON DI MEMORIA
Kapasidat di warda dato ta un parti integral di e eksperensha riba un tèblet. Pelíkula, muzik, wega òf buki pa hopi hende ta e rason mas importante pa kumpra un tèblet. E kapasidat pa warda e kontenido aki ta importante. Kapasidat di memoria ta kuminsá na 8GB (Gigabyte) anto ta dòbel ta na 64GB. Mas kapasidat e tèblet tin mas kontenido bo por warda riba dje. Tin tèblet ku por akapará memoria separá ku kua bo por ekspand’é fásilmente ku por ehèmpel un karchi di memoria (SD card).
DISEÑO
Un tèblet ta un aparato ku bo ta karga hopi i ta importante p’e sinta bon den bo man. Peso i tamaño ta importante den esaki, pero tambe balanse. Sierto tèblet ta mas pisá ku otro. Pero dor ku tin fabrikante ku ta sòru pa distribuí e komponentenan bon den e tèblet, e ta sinta bon den bo man. Un tèblet mas pisa pues por sinta mihó den bo man ku unu mas fofo. Semper ta bon pa tèst e tèblet den bo man promé ku kumpra pa bo por hasi un eskoho ku ta pas ku bo. Pa un tèblet mas chikí lo bo ke por ehèmpel tèst e den bo tas òf saku promé ku bo kumpra esaki.
KONKLUSHON
Mirando tur e argumentunan aki riba, nos lo por konkluí ku e Apple Ipad (4th Generation) ta e promé eskoho basá riba spit, kantidat di aplikashon disponibel i fasilidat di uso riba diferente aparato di e mesun fabrikante. Su bo budget ta un tiki ménos, un bon di dos lugá ta e Asus Transformer Pad Infinity TF700.
Un kontribushon di:
Frans van der Horst
ICT Professionals B.V.