Konsumidó Alertá Volumen 8, yüni - yüli 2014 - Page 7

Eskoho di kompania ku ta bai traha unifòrmnan

Skolnan mes tambe ta disidí na kua kompania ta laga traha e unifòrmnan. Pues no ta un kompania tin, kaminda tur skol ta laga traha unifòrm pa nan alumnonan, pero ta dependé di e desishon di kada skol na kua kompania nan ta duna e oportunidat pa traha e unifòrmnan. Direktiva di Skolnan Katóliko ta rekerí skolnan katóliko pa buska oferta serka tres diferente kompania i a base di e ofertanan aki, ta tuma un desishon. Pa skolnan públiko ta konta ku tur skol mester duna kompanianan lokal ku por traha unifòrm, chèns pa bira e kompania ku ta traha e unifòrm pa e aña eskolar nobo. Ta skohe e kompania ku ta bai traha e unifòrm pa e siguiente aña eskolar a base di kriterionan ku for di kuminsamentu di prosedura a wòrdu poné riba papel i ta konosí na e kompanianan ku a inskribí pa tin e oportunidat pa traha e unifòrm di skol pa e siguiente aña eskolar.

Emblema di skol apart

Tur unifòrm mester tin e nòmber di skol òf emblema di e skol riba dje. Pa redusí gastunan, sierto skolnan katóliko ta duna e mayornan tambe e posibilidat pa simplemente kumpra e emblema di e skol i kose esaki riba un T-shirt òf poloshirt. Direktiva di Skolnan Katóliko a informá su skolnan ku for di komienso di aña eskolar 2012-2013 tur skol katóliko mester ta disponé di emblemanan di skol den dado kaso ku mayornan mes ke kumpra nan mes T-shirt òf poloshirt i kose e emblema riba esaki. Tambe a informá ku e unifòrm mester ta un sierto manera ku no ta difísil pa e mayor ku mes ke kose òf laga kose unifòrm di su yu, pa hasi esaki. Si ta asina ku e unifòrm di e alumno ku su mayornan mes a (laga) kose, mester ta idéntiko na e unifòrm di e otro alumnonan. Pa loke ta trata skolnan protestant, e opshon pa kumpra emblema i laga pega esaki riba un T-shirt òf poloshirt no tei. Nos a komprondé ku den pasado tabatin un skol protestant ku tabata duna mayornan e opshon aki, pero esaki no ta posibel mas.

Preis di unifòrm

Komo ku kada skol ta skohe e kompania na kua e ta laga traha unifòrm pa su alumnonan, preis di unifòrm ta varia di skol pa skol. Punto di salida di e Direktiva di Skolnan Katóliko ta ku unifòrm tei pa seguridat i mester ta duradero i pagabel. Komo esaki ta e punto di salida di Direktiva di Skolnan Katóliko, skolnan katóliko no tin mag di buska di hasi ganashi ku bendementu di unifòrm. Tambe Direktiva di Skolnan Katóliko a introdusí preisnan máksimo pa sèt di unifòrm. 1 sèt di unifòrm ta konsistí di 2 karson/saya i 3 poloshirt/T-shirt/blusa.

E preis máksimo pa un sèt di unifòrm (2 karson/saya + 3 poloshirt/T-shirt/blusa) pa skolnan katóliko ta lo siguiente:

Pa skol di lushi: NAf. 125,-

Pa skol di fundeshi: NAf. 210,-

Pa skol sekundario: NAF. 30,- pa blusa/T-shirt/poloshirt.

Kompensashon pa kompra di unifòrm

Por pasa ku tin mayornan ku no tin e sèn pa paga unifòrm. Skolnan públiko mester tene kuenta ku esaki i mester buska un solushon adekuá pa esaki. Skolnan públiko ku konfrontá e situashon aki, lo referí e mayornan na instanshanan ku ta yuda ku finansiamentu di unifòrm. Tambe ta pidi mayornan pa entregá unifòrmnan den bon kondishon na e skol, ya asina por duna esakinan grátis na alumnonan di kua nan mayornan no tin e medionan pa kumpra nobo. Mayornan ademas por yega na areglo di pago ku e skolnan pa asina paga e montante poko poko.

Pues si bo ta den un situashon finansiero prekario i no tin sèn pa paga pa unifòrm pa bo yunan, wak na e skol mes kua ta e posibilidatnan. Sinembargo ta bon pa remarká ku komo mayor bo por kuminsá spar di antemano pa bo no haña bo den problema di sèn na komienso di aña eskolar komo bo tin ku kumpra unifòrm di skol.

NOTISIA