Konsumidó Alertá Volumen 8, yüni - yüli 2014 - Page 22

Un bon kuido pa bo pianan ta esensial. Algun rekomendashon:

• Kontrolá ku regularidat si tin herida pia;

• Kayo i lekdor mester wòrdu kita na un salon ku ta spesialisá den pedikür

médiko;

• No kana pia abou, semper bisti un ko’i pia;

• Bisti bon sapatu (preferibel plat); hendenan ku problema ku sirkulashon hopi

biaha ta kumpra sapatu muchu chikí. Dor di e nèrvionan di e pia no tin bon

sensashon mas, bo no ta sinti ku e sapatu no ta sinta bon;

• Usa bon mea, sin elastik ku no ta muchu pèrtá;

• Sòru semper pa e pianan ta bon seká. Prinsipalmente mei mei di e dedenan;

• No hinka pia den awa kayente (mester evitá temperatura haltu);

• Uña mester ta règt kòrtá i no muchu kòrtiku;

• Hunta pianan seku ku zeta fini òf krema di pia, preferibel ku un

produkto di pedikür spesial pa diabétis;

• Moveshon òf masashi ta bon pa sirkulashon

di sanger;

• No usa gasa òf ferbant, paso e por pone

hopi preshon riba sierto lugá den e sapatu;

• Si tin herida no pone e pia den awa ku soda

òf usa zalfi. Esaki por duna bo infekshon.

• Konsulta semper ku bo dòkter di famia. Ta mihó prevení

ku kura.

Na promé lugá un persona ku ta sufri di diabétis mester

tene e nivel di glukosa den sanger bon bou di kòntròl.

Suku haltu den sanger ta stroba sirkulashon di sanger ku por pone ku un herida no ta kura lihé. Na di dos lugá personanan ku diabétis mester kontrolá nan pianan tur dia. Nan mester wak si e pia ta kòrá, si e tin blar, herida, lekdor, òf mancha pretu ku ta síntomanan di un inflamashon. Loke tambe ta importante ta pa paga tinu si tin kambio na e forma di pianan. Si e persona mes no ta den kondishon pa inspekshoná su pia, lo ta ideal pa un persona yegá hasi e kòntròl, òf por kontratá un persona ku ta duna kuido na kas pa regularmente kontrolá e pianan. Si den e kòntròl konstatá algu otro for di normal, tin ku tuma akshon mesora i traha un sita ku e dòkter di kas, un enfermera di diabétis, un podoterapista òf un salon ku ta hasi pedikür médiko. Ounke ku e persona ku tin diabétis mes ta kontrolá su pia tur dia, ta rekomendabel pa laga hasi kòntròl por lo ménos un bes pa aña serka bo dòkter di kas òf un enfermera ku ta spesialisá den kuido diabétiko.

Tep- i rekomendashonNAN

Kuido di pia pa un diabétiko

Kuido preventivo, sapatu adekuá, aktua i tuma akshon na tempu i, si ta nesesario, kuminsá un tratamentu, ta hopi importante pa un persona diabétiko ku

problema ku pia.