Konsumidó Alertá Volumen 8, yüni - yüli 2014 - Page 17

Kon pa buster durabilidat di bateria di bo smartphone

LIQUAM Maecenas ipsum ALIQUAM

No laga bo smartphone kaminda ta kayente

E pió enemigu di bo smartphone su bateria ta kayente. Ku esaki nos no ke bisa ku bo tin ku hinka bo smartphone den frishidèr pa tené friu. Ora bo smartphone pasa un periodo den kayente, esaki ku tempu ta baha e efisiensia di bo smartphone su bateria. Pues tene kuenta ku esaki i no laga bo smartphone keda periodonan largu den un outo kayente por ehèmpel, òf kumpra un fèn chikí pa bo smartphone ku tantu bo stima. Sigur aki na Kòrsou, kaminda nos ta biba den un klima kayente, tene kuenta ku e informashon aki.

Usa Power Saving mode

Un otro método ku ta evitá ku bo bateria ta kaba ta pa aktivá power saving mode. Kasi tur smartphone moderno ta bini ku e posibilidat pa bo aktivá power saving mode. Ora bo aktivá power saving mode, e ta oumentá e tempu di standby di bo smartphone, dor ku e ta paga sierto aplikashonnan i aktividatnan den background na momentu ku e bateria baha i yega un sierto porsentahe. Aunke ora bo aktivá power saving mode esaki ta limitá bo smartphone i bo por hasi uso di solamente funshonnan básiko manera hasi yamada i manda un mensahe di teksto, dor di aktivá power saving mode bo por gana algun ora promé ku e bateria yega 0% anto e smartphone paga.

Evitá di laga bo bateria yega 0%

Evitá ku frekuentemente bo bateria di smartphone ta baha por kompletu i yega 0%, komo ku esaki ta e manera di mas efisiente pa detené e proseso ku e bateria ta bira bieu. Esaki ta pone ku e bateria lo daña ménos lihé i lo dura bo mas tantu. Ora e bateria di un smartphone baha muchu, e ta bira hopi instabil. E bateria di smartphone, ku ta bateria lithium-ion, ta diseñá originalmente pa wòrdu kargá trempan i frekuentemente. Ke men si bo laga un tiki energia den e bateria, esaki sigur ta traha na bo fabor!