Konsumidó Alertá Volumen 55 - Page 9

Artíkulo kortesia di abogado

Mr. A.V.G. Rooijer,

Mirando kosnan deshonesto ku sa sosodé, bou di sierto sirkunstansianan nos sa tin komprenshon pa ku e posishonamentu di un ke otro kompania di seguro. Pero tin bia e posishonamentu por resultá unu inhustu i irasonabel. Ta parse ku sierto kompanianan di seguro a bin ta hasi’é un kustumber pa akusá aseguradónan di a krea sierto situashonnan pa por saka benefisio finansiero for di esakinan. Sinembargo, mester pone bon kla ku un akusashon asina’ki ta unu hopi serio ku tin ku keda bon supstansiá.

Esaki a bin bon kla dilanti den un kaso kaminda un kompania di seguro a presta di akusá su asegurado di a mèldu un robo den un pakus, ku segun e kompania, no a tuma lugá. Apesar ku e komapnia di seguro a laga traha diferente rapòrt pa supstansiá su akusashonnan, den apelashon e no a sa di konvensé 3 wes ku e asegurado lo a kometé froude.

Korte di Apelashon a ordená e kompania di seguro pa saka nòmber di e asegurado for di e registro di hendenan ku a kometé froude kontra di entidat finansiero. Di otro banda a sosodé den un otro kaso ku Korte a haña ku e asegurado a duna e komapnia di seguro sufisiente rason pa duda ku e aksidente di trafíko tabata unu ku a sosodé di bèrdat. Loke entre otro a hunga un ròl determinante den esaki tabata deklarashonnan kontradiktorio di esnan embolbí.

Mirando ku kompanianan di seguro mas i mas ta bin ku e tipo di akusashonnan aki, nos ta bolbe enfatisá ku ta na nan pa prueba ku tin un kaso di froude. E asegurado ku ta den un nesesidat urgente pa su daño keda kubrí, por kuminsá un huisio sumario den kua e ta eksigí pago di un adelanto pa drecha su vehíkulo i/òf kubrí gastunan di outo di hür. Si e komapnia di seguro no logra konvensé e wes ku tin un kaso di froude, wes lo honra e petishon di e asegurado i sentensiá e kompania di seguro na paga daño i perhuisio na e asegurado.

Por bisa finalmente ku tin diferente kaso kaminda tipo di akusashonnan manera esunnan menshoná ta bin dilanti, hopi bia ku intenshon pa no kubri daño di e asegurado. Kompanianan di seguro mester perkurá si, di supstansiá e akusashonnan aki sufisiente. Sino e chèns ta grandi ku nan lo keda sentensiá na paga daño i perhuisio na e asegurado mas tur e gastunan ku e mester a hasi pa hiba e kaso Korte.

Artíkulo kortesia di abogado

Mr. R. Conquet

RC LEGAL

Mahaaiweg no. 9A

5270622-7880151

Den nos trabou diario nos ta atendé entre otro ku kasonan di aksidente den trafíko ku òf sin daño físiko komo konsekuensia. Sinembargo, último tempu mas i mas nos a bin ta konstatá ku kompanianan di seguro ta pone hopi traba, promé ku nan kubri un daño òf paga daño i perhuisio na un persona.