Konsumidó Alertá Volumen 55 - Page 3

Aña 2020 lo pasa pa historia komo un di e añanan mas desafortuná pa Kòrsou i mundu. Mirando e situashon ekonómiko ku nos isla a bin ta pasa den e último añanan, covid-19 a kaba di devastá nos ekonomia nashonal i hasi nos ekonomia mas vulnerabel i dependiente di ayudo eksterior. Hopi di nos a pèrdè trabou òf mester a entregá salario hasiendo ku nos poder di kompra nashonal a disminuí konsiderablemente.

Di tur forma, nos salubridat ta mas importante ku tur otro kos. I pa esei nos mester kuida nos mes i nos famia manteniendo nos estriktamente na medidanan pa mitigá e riesgo pa keda kontaminá ku e vírus ku ta asotando mundu. Tene distansia sosial, tene nos mes na reglanan di higiena, pero tambe evitá di ta den gruponan grandi di hende. Tur ta medidanan pa nos protehá nos mes. Ta komprendibel ku bo por sinti bo limitá pa e medidanan, pero tene na kuenta ku teniendo bo mes na e medidanan bo ta kuidando salú di bo mes, bo famia i bo komunidat. I sigui tambe e konferensianan di prensa di gobièrnu di Kòrsou pa asina keda al tantu di desaroyonan nobo i kualke kambio di medidanan.

Den e edishon aki di Konsumidó Alertá nos lo dediká atenshon entre otro na e parti mental i strès ku preokupashon pa ku covid-19 por trese kuné. Un artíkulo interesante i ku tepnan balioso pa kita strès i relahá den e periodo difísil i kompliká ku nos ta pasando aden. Tuma nota di esaki i tambe di e sobrá artíkulonan interesante i edukativo den nos edishon nobo di Konsumidó Alertá.

Danki pa ta huntu ku nos.

Editorial

EDITORIAL

Direktor

PALABRA DI MOTIVASHON

Marc Marshall