Konsumidó Alertá Volumen 55 - Page 10

E kompra di UTS dor di e kompania Flow a trese konsekuensianan pa nos merkado di telekomunikashon. Esun ku nos komo konsumidó ta nota dirèkt ta e echo ku bo tin un kompania ménos pa kompará i skohe di dje na momentu ku bo ke kumpra servisio di telekomunikashon. E limitashon di eskoho aki ta pone ku si bo provedor di telekomunikashon kambia kondishonnan, pakete òf preis di su produktonan, abo konsumidó no tin hopi otro opshon pa stòp bo kontrakt i kumpra e servisio na un otro kompania.

Merkado di telekomunikashon, meskos ku di awa i koriente, tabata unu regulá den pasado. Regulashon ta nifiká ku gobièrnu ta intervení den e merkado pa garantisá suministro, disponibilidat, preis i akseso na un produkto òf servisio, komparabel ku kombustibel òf produktonan den makutu básiko.

Pues ménos kompetidó tin riba un merkado, mas e merkado por keda regulá i mas kompetidó independiente di otro tin riba un merkado mas liber i habrí e merkado por ta. Ta tarea di gobièrnu pa monitoriá merkadonan i intervení na momentu ku tin indikashon ku no tin kompetensia sanu i habrí riba un (parti) di merkado.

Na Kòrsou nos konosé algun aña kaba e Outoridat di Kompetensia (FTAC) ku ta e outoridat independiente ku ta kontrolá nos merkadonan no regulá pa asina tin kompetensia liber i ku no tin estorbo pa kompetidónan nobo subi i bende riba un merkado. Un di FTAC su tarea ta pa kontrolá i sanshoná tur aktonan di kompania ku ta impedí un bon funshonamentu di un merkado liber. Por pensa na aktonan manera trahamentu di afsprak di preis pa konsumidó, partimentu di merkado entre kompanianan i ponementu di estorbo pa kompetidónan nobo subi un merkado.

Si un kompania baha preis òf tarifa di su produkto òf servisio nèt promé ku un kompania nobo kuminsá bende e mesun produkto òf servisio ku e intenshon pa saka e kompetidó nobo fo’i merkado pa despues ku e kompetidó nobo bati fayit e hisa su preisnan bèk, e ta hasiendo mal uso di su posishon di poder riba e merkado. Esaki tambe por ta un akto kastigabel ku FTAC ta kontrolá.

REGULASHON DI MERKADO DI TELEKOMUNIKASHON