Konsumidó Alertá Volumen 39 Yanuari 2018 - Page 14

Den e temporada di Karnaval aki Fundashon pa Konsumidó ke alertá tur konsumidó pa pone èkstra atenshon riba preisnan di produktonan di konsumo.

Pa e temporada festivo aki, Fundashon pa Konsumidó, konhuntamente ku Ministerio di Desaroyo Ekonómiko (MEO), a hasi un komparashon di preis di produktonan di konsumo ku ta kai den e ‘Makutu di Karnaval’. Esaki ta konsistí di 154 produkto i ku ta reparti den e siguiente kategorianan: awa mineral, djus, limonada, soda water,’energy drink’ serbes, whisky, ròm, biña, chips, karni, tuna, makaroni, berdura den bleki, mayonaise, kèchùp, mustard, papel di wax, napkins, kùp i tayó di plèstik. Pa kompará e produktonan aki a bishita un total di 20 establesimentu den e periodo di 15 te ku 25 di yanüari 2018. E establesimentunan aki ta: Supermarket 2000, Arco Iris, Best Buy, Bon Biní, Boulevard Marketplace, Centrum Mahaai, Centrum Piscadera, Esperamos, Exito, Mangusa Rio, Mangusa Hypermarket, Vreugdenhil, Bonam Minimarket, Li’s Minimarket, Luna Park, LZF minimarket, New Plaza, Tropical Minimarket, Queens Minimarket i Van der Tweel.

Mangusa Hypermarket, e supermerkado mihó surtí.

For di e análisis nos a konstatá ku Mangusa Hypermarket ta e supermerkado ku tin un variedat di produkto mas amplio kompará ku e demas supermerkadonan. Di e 154 produktonan pre selektá, Mangusa Hypermarket ta tin 130 produkto. Bon Bini Supermarket tambe ta tin un variedat amplio di produkto den rèki. Di e 154 produktonan pre selektá, nan ta tin un total di 121 produkto. E di tres supermerkado ku un variedat amplio di produkto ta Mangusa Rio Canario. Esaki ta tin un total di 120 produkto for di e 154 produktonan ku a keda pre selektá.

Pa kompra di bo Makutu di Karnaval? Ta na Mangusa Hypermarket bo mester ta!

For di e resultadonan di e komparashon di preis, nos por konkluí ku Mangusa Hypermarket ta esun ku tin mas produkto na un preis mas ekonómiko. Esaki debí ku for di e 154 produktonan pre selektá, e supermarket aki tin un kantidat di 46 produkto na un preis mas abou. Na di dos lugá ta resultá Mangusa Rio Canario ku un kantidat di 43 produkto i na di tres lugá Bon Bini Supermarket ku un total di 30 produkto.

DIFERENSIA DI PREIS

Remarkabel den e investigashon aki ta e diferensia grandi di preis pa loke ta trata e kategoria di bibidanan alkohóliko. Por ehèmpel un Dewar’s White Label (1.14 liter). Na Centrum Mahaai i Centrum Piscadera esaki ta kosta fl. 39.00. Sinembargo na Luna Park Minimarket e mesun produkto aki ta kosta fl. 52.95, kual ta un diferensia di preis di fl. 13.95. Un krat di serbes Presidente na bòter di 12oz ta kosta na Van der Tweel fl. 51.99 i na Centrum Mahaai esaki ta kosta fl. 65.30, kual ta un diferensia di preis di fl. 13.31. Un krat di Amstel na bleki di 33cl ta kosta na Boulevard Market Place fl. 44.99 i na Best Buy esaki ta kosta fl. 58.45 kual ta un diferensia di preis di fl. 13.46.

Despues di a tuma nota di e resultadonan di e anotashon di preis di e makutu di karnaval, Fundashon pa Konsumidó ke motivá tur konsumidó pa tuma nota di e komparashon di preis aki pa bo por tin un bista di e preisnan den e diferente establesimentunan. E temporada di Karnaval aki ta un temporada kòrtiku, pero unu hopi drùk. Pues, Kòrda traha un lista di kompra promé ku bo bai hasi bo kompra.

Makutu di Karnaval!

KOMPARASHON DI PREIS